Hvetja bændur til að hefja þörungabúskap

Þörungabúskapur gæti orðið framtíðarbúgrein íslenskra bænda, miðað við það nýjasta sem er að gerast í Ameríku. Þar eru bændur farnir að rækta þörunga í sjó til manneldis, en þeir þykja ofurfæða og gott vopn gegn súrnun sjávar. Um þetta var fjallað í fréttum Stöðvar 2. 

Hérlendis hafa menn raunar unnið þörunga úr Breiðafirði frá árinu 1975 en þar er þeim skipað á land á Reykhólum. Í þörungaverksmiðjunni eru þeir þurrkaðir, malaðir og sekkjaðir og seldir út í heim, meðal annars til nota í matvæla- og lyfjaiðnaði.

Fréttaþátturinn 60 mínútur, sem sýndur var á Stöð 2 um síðustu helgi, lýsti því hvernig augu vísindaheimsins og matvælageirans eru farin að beinast að þörungum sem ofurfæðu. Fréttamaðurinn Lesley Stahl heimsótti fyrsta bandaríska þörungabúgarðinn. Þeir eru nú orðnir níu talsins og hálf tylft til viðbótar í undirbúningi. 

„Við vonum að eftir tíu, tuttugu ár verði þúsundir bænda farnir að gera þetta. Við teljum að þetta sé framtíðin, að færa okkur út á sjó,” segir þörungabóndinn Bren Smith.

Við ræktunina er þörungafræjum komið fyrir á reipum og þau sett í sjó. Ólíkt ræktunarjurtum á landi þarf engan áburð og þörungarnir fá alla sína næringu í sjónum. Á fimm til sex mánuðum vaxa örsmá fræin upp í fjögurra til fimm metra langar plöntur.

„Þessi planta er ein af þeim sem vaxa hraðast á jörðinni,” segir þörungabóndinn.

Fimm mánuðum síðar er kominn þaraskógur. Uppskeran rokselst, að sögn bóndans. Meðal viðskiptavina hans eru Google fyrir starfsmannamötuneyti sín, Yale-háskóli og nokkrir veitingastaðir og heildsalar.

Þörungar þykja ríkir af kalki, trefjum, járni og andoxunarefnum. Kokkur, sem gefið hefur út matreiðslubók með þörungaréttum, eldaði einn réttinn fyrir Lesley Stahl.

„Þetta er mjög gott, sannarlega gott,” voru viðbrögðin þegar hún bragðaði á matnum.

Vísindamenn segja ræktun þörunga vinna gegn súrnun sjávar. 

„Hugsaðu þér tré á landi sem draga koldíoxíð úr andrúmsloftinu. Þang og þari eru mjög góð í að draga koldíoxíð úr sjónum,” segir Betsy Peabody, stofnandi og framkvæmdastjóri Puget Sound-umhverfissjóðsins, sem styður við rannsóknir á þessu sviði. 

-Svo það sem þið eruð að gera samsvarar því að planta trjám í sjónum? 

„Einmitt,” svarar Betsy. 

Bændurnir fá þann bónus að ræktun skeldýra eins og kræklinga fer vel saman með þörungaræktinni, eins og Bren Smith sýndi í fréttinni. 

-Ertu þá fiskimaður eða bóndi? 

„Ég er bóndi núna, hvort sem mér líkar það betur eða verr. Ég er sjávarbóndi,” svarar Bren Smith. 

Núna er það spurningin hvort þess verði langt að bíða að þörungabúgarðar sjáist á íslenskum fjörðum. 

Hér má sjá frétt Stöðvar 2: