Mannskæðar árásir ISIS í Sýrlandi

Minnst 180 eru látnir eftir fjölda árása vígamanna Íslamska ríkisins í suðurhluta Sýrlands í dag. Gerðar hafa verið sprengju- og skotárásir og er þetta með mannskæðustu árásum hryðjuverkasamtakanna í Sýrlandi. Stjórnarher Bashar al-Assad, forseta Sýrlands, og bandamenn hans herja nú á ISIS-liða í suðurhluta landsins og voru umræddar árásir gerðar í borginni Sweida og þorpum þar nærri.

Samkvæmt AFP fréttaveitunni hafa ISIS-liðar lýst fyrir ábyrgð á árásunum og segja hermenn samtakanna hafa ráðist á opinberar byggingar og öryggissvæði í Sweida og sprengt sig í loft upp. Vopnaðir menn brutust inn á heimili fólks í nærliggjandi þorpum og skutu þar fjölda fólks til bana.



Syrian Observatory for Human Rights, sem rekur umfangsmikið net heimildarmanna í Sýrlandi, segir 183 hafa fallið í árásunum og þar af 89 almenna borgara. Hinir 94 hafi barist fyrir ríkisstjórn Assad, að mestu leyti til að verja heimili sín, samkvæmt SOHR.

38 ISIS-liðar eru sagðir hafa verið felldir.

Íbúar Sweida tilheyra að mestu minnihlutahópi sem nefnist Druze og hefur bærinn sloppið tiltölulega vel í átökunum sem hafa átt sér stað í landinu frá 2011.