Tíu ára fangelsi fyrir að „hræða konu til dauða“

Carlton Young, hefur verið dæmdur í tíu ára fangelsi fyrir að hafa orðið Connie Loucks að bana með því að „hræða hana til dauða“.

Young ásamt samverkamönnum braust inn á heimili hennar í bænum Wells í Maine með þeim afleiðingum að Loucks fékk hjartaáfall og lést. Innbrotsþjófarnir komu þó ekki nálægt Loucks heldur var innbrotið nóg til þess að kalla fram banvænt hjartaáfall því hún var hjartveik fyrir.

Að því er fram kemur í frétt Sky News var forsaga málsins sú að Young og félagar brutust inn á heimili Loucs árla morguns í mars árið 2015. Þeir bönkuðu á glugga og dyr og komust að því að enginn var heima. Þeir brutust inn og stálu miklum verðmætum, þar á meðal skartgripasafni Loucks.

Þetta reyndist þó ekki hafa verið nóg fyrir innbrotsþjófana því næsta dag sneru þeir aftur.

Loucs var í símanum að ræða við dóttur sína þegar mennirnir börðu að aftur að dyrum og bönkuðu á glugga og þá varð Loucs verulega bilt við því hún gerði sér strax grein fyrir hvað væri í gangi. Hún sagði dóttur sinni að hún væri nokkuð viss um að lætin kæmu frá sömu mönnum og brutust inn hjá henni daginn áður. Þegar Loucs hafði sagt þetta slitnaði samtalið.

Sarah, dóttir Loucs, hringdi tafarlaust í neyðarlínuna en þegar lögreglu bar að garði lá Loucs meðvitundarlaus í sófanum í stofunni. Við krufningu á líkinu kom síðan í ljós að hún hefði dáið úr hjartaáfalli.

Young svaraði fyrir ákæruatriðin og samdi um lyktir málsins á mánudag þannig að hann þarf ekki að mæta fyrir rétt. Dómari hefur samþykkt og dæmt hann til tíu ára fangelsisvistar.

„Þetta er ólýsanlegur harmleikur fyrir okkur fjölskylduna. Það líður ekki sá dagur sem ég hugsa ekki um hvernig Connie hlýtur að hafa liðið þegar þeir brutust inn þennan dag. Hún var ljúf, ástrík og góð og hún átti þetta ekki skilið,“ segir Brian Loucks um Connie.