Stefna á að taka Vaðlaheiðargöng í notkun í byrjun desember

Vaðlaheiðargöng verða tekin í notkun 1. desember gangi allt að óskum. Verktakinn sem hefur unnið að greftri ganganna og félagið Vaðlaheiðargöng hf. staðfestu í dag samkomulag um verklokadag og gerðu samkomulag um uppgjör og greiðslu bóta til verktakans. Stjórnarformaður Vaðlaheiðaganga segir að kostnaður við göngin verði innan ramma lánsheimildar ríkisins.

Ósafl sf. afhendir göngin tilbúin til umferðar föstudaginn 30. nóvember, að því er segir í sameiginlegri tilkynningu Vaðlaheiðarganga hf. og Ósafls sf. Þá er miðað við að göngin verði tekin í notkun 1. desember.

Samhliða samkomulaginu um verklokadag gerðu félögin samkomulag um uppgjör og greiðslu bóta til Ósafls á grundvelli úrskurðar sáttanefndar. Bæturnar eru tilkomnar vegna áhrifa umfangsmeiri jarðhita á gangnaleiðinni en búist var við. Þær nema 1.740 milljónum króna á núverandi verðlagi.

Vaðlaheiðargöng hf. hafa áskilið sér rétt til þess að fá úrskurð um bótafjárhæðina fyrir dómstólum.

Upphaflega voru verklok áætluð árið 2016. Verkið hefur hins vegar dregist á langinn, ekki síst eftir að stór heitavatnsæð opnaðist í þeim árið 2014. Alþingi samþykkti upphaflega ríkislán fyrir framkvæmdina upp á 8,7 milljarða króna árið 2012. Lánið var síðar hækkað í 14,4 milljarða í fyrra.

Hilmir Gunnlaugsson, stjórnarformaður Vaðlaheiðarganga hf., segir að kostnaður og það sem eftir standi ef verksamningi muni rúmast innan lánsheimildarinnar frá ríkinu.