Vilhjálmur selur hlut sinn í ALP

Vilhjálmur Sigurðsson, framkvæmdastjóri Sölu og Markaðssviðs ALP hf. sem rekur Avis, Budget, Payless og ZipCar, hefur hætt störfum eftir að hafa selt hlut sinn í fyrirtækinu.

Samhliða þessu hefur hann ásamt eiginkonu sinni aukið við eignarhlut sinn í Hótel Láxa í Mývatnssveit og Hótel Kríu í Vík í Mýrdal. Þau hyggjast nú einbeita sér að hótelrekstri og öðrum fasteignarverkefnum.

Vilhjálmur hefur verið einn af eigendum ALP hf síðan 2010, en þá keypti hann fyrirtækið í annað sinn eftir að hafa selt það árið 2007. 

Í tilkynningu frá Vilhjálmi segir að Vilhjálmur hafi 29 ára reynslu af rekstri bílaleiga en hann skrifaði undir fyrsta sérleyfissamning Budget á Íslandi árið 1991. 

„ALP rekur  eina stærstu bílaleigu landsins með tæplega fjögur þúsund bifreiðar.  Fyrirtækið hefur náð frábærum árangri í sölu og markaðsmálum og m.a. hlotið verðlaunin „Licensee of the Year” hjá Avis Budget Group oftar en nokkuð annað land í Evrópu, Mið-Austurlöndum og Afríku,“ segir jafnframt í tilkynningunni.