Banaslys í Borgarfirði

Ökumaður bifreiðar sem lenti í alvarlegu umferðarslysi var úrskurðaður látinn í gærkvöldi skömmu eftir komu á slysadeild. Þetta kemur fram í tilkynningu frá lögreglunni á Vesturlandi. Tildrög slyssins og orsakir liggja ekki fyrir og er áfram unnið að rannsókn málsins.

Slysið varð á Borgarfjarðarbraut rétt norðan við Flókadalsá á sjöunda tímanum í gærkvöldi. Bíllinn, sem ökumaðurinn var einn í, fór nokkrar veltur. Var maðurinn fluttur alvarlega slasaður á slysadeild í Reykjavík með þyrlu Landhelgisgæslunnar.

Þá var slökkvilið Borgarbyggðar kallað út ásamt lögreglu en beita þurfti klippum til að ná manninum út úr bílnum.

Fréttin hefur verið uppfærð.