500 milljónir gestir Marriott-hótela fórnarlömb tölvuárásar

Persónulegar upplýsingar um 500 milljóna gesta hótela Marriott International eru sagðar hafa komist í hendur tölvuþrjóta eftir árás þrjótanna á hótelkeðjuna.

BBC segir frá því að upplýsingar gesta Starwood-hótelanna, sem eru í eigu hótelrisans Marriott International, hafi mögulega komist í hendur þrjótanna.

Innanhússrannsókn hjá hótelunum á að hafa leitt í ljóst að einhver hafi ólöglega verið með aðgang að tölvukerfi Starwood-hótelanna, dótturfélags Marriott, allt frá árinu 2014.

Marriott International hyggst senda viðskiptavinum sínum, sem eru í umræddum skrám félagsins, tölvupóst þar sem greint er frá árásinni. W Hotels, Sheraton, Le Méridien og Four Points by Sheraton eru allt hótelkeðjur sem heyra undir Starwood.

Í tilviki 327 milljóna viðskiptavina snúast upplýsingarnar, sem eiga að hafa komist í hendur árásarmannanna, um nafn viðkomandi, tölvupóst, símanúmer, heimilisfang, vegabréfsnúmer, reikningsnúmer, fæðingardag, kyn og komu- og brottfarardag.

Til stendur að opna Marriot hótel við Hörpu tónlistar- og ráðstefnuhús í Reykjavík á næsta ári. Hótelið verður 250 herbergja fimm stjörnu hótel.