Innlent

Vaknaði upp við vondan draum á rúmsjó: „Ég er bara í sjokki“

Kolbeinn Tumi Daðason skrifar
Hjólhýsið stóð í ljósum logum sem teygðu sig yfir í Benz-inn.
Hjólhýsið stóð í ljósum logum sem teygðu sig yfir í Benz-inn. Sigfús Steindórsson
Ásgeir Helgi Þórðarson segir það hafa verið mikið áfall þegar hann fékk þau tíðindi á rúmsjó að nýlegur Mercedes-Benz hefði brunnið til kaldra kola.

Ásgeir Helgi, sem er skipverji á Kristrúnu Re, var sofandi þegar hann fékk símtalið með fregnunum.

Ásgeir Helgi Þórðarson.
Það var upp úr klukkan hálf fimm í gær sem slökkviliðinu á höfuðborgarsvæðinu barst tilkynning um að hjólhýsi stæði í ljósum logum úti á Granda í Reykjavík. 

Mikinn svartan og þykkan reyk lagði frá brunanum svo til sást víða á höfuðborgarsvæðinu. Slökkviliðinu gekk greiðlega að slökkva eldinn en hjólhýsið er gjörónýtt og sömuleiðis Mercedes Benz bíll Ásgeirs Helga sem var lagt við hliðina á.

 Karlmaður sem bjó í hjólhýsinu náði að koma sér út áður en slökkviliðið bar að garði. 

 „Ég fékk bara hringingu í gærkvöld hingað út á sjó, var vakinn við þessar glötuðu fréttir,“ segir Ásgeir Helgi í samtali við Vísi.

„Ég er bara í sjokki.“

Frá vettvangi á Granda í gær.Sigfús Steindórsson
Bíllinn er gjörónýtur en um er að ræða Benz c55 amg sem að sögn Ásgeirs Helga er sjaldgæf tegund af Benz. Hann var tryggður og vonar Ásgeir að tryggingar dekki skaðann.

 „Ég var búinn að eiga hann í hálft ár. Ég var þrjár vertíðir að safna fyrir honum.“

 En það var ekki bara bíllinn sem skemmdist heldur var Ásgeir Helgi með búnað í bílnum.

Slökkviliðsmaður í baráttu við eldinn.Sigfús Steindórsson
„Allt snjóbrettadótið mitt var í skottinu,“ segir Ásgeir Helgi sem verður að óbreyttu á sjó út mánuðinn.

 „Það gæti verið að mér verði bara skutlað í land út af þessu. Ég trúi þessu bara ekki.“

 Hann segir það furðulega að fyrir nákvæmlega ári síðan hafi verið ekið á 745 BMW bíl hans og stungið af.

 „Þetta er bara alveg glatað.“

Tildrög brunans eru til rannsóknar.

Fjallað var um brunann í fréttum Stöðvar 2 í gær þar sem sjá má myndbönd frá vettvangi.

Slökkvilið Tryggingar

Tengdar fréttir

Eldur logaði í hjólhýsi á Granda

Mikinn sótsvartan reyk lagði frá Grandanum í Reykjavík þar sem eldur logaði í hjólhýsi. Lögregla lokaði fyrir umferð um svæðið.

Kom sér út áður en slökkvilið bar að garði

Karlmaður sem býr í hjólhýsinu sem brann við Grandagarð í dag, komst út úr hjólhýsinu áður en slökkvilið bar að garði. Hjólhýsið var alelda þegar slökkvilið mætti á vettvang að sögn varðstjóra.

Mest lesið


Fleiri fréttir

Sjá meira


×

Mest lesið