Mac DeMarco snýr aftur á Airwaves

Hundruð hljómsveita frá öllum heimshornum koma fram á Iceland Airwaves í ár. Meðal stærstu stjarnanna er kanadíski tónlistarmaðurinn Mac DeMarco. Early Bird miðar eru nú til sölu í takmarkaðan tíma.

„Mac DeMarco á stóran aðdáendahóp hér á Íslandi og íslenskir tónlistarmenn dýrka hann. Hann kom fyrst fram á Airwaves árið 2013 og var þá á fyrstu metrunum á ferlinum. Nú selst alls staðar upp þar sem hann kemur fram og lögum hans er streymt hundruð milljóna sinnum,“ segir Sindri Ástmarsson, bókunar- og dagskrárstjóri Airwaves og fagnar komu kanadíska tónlistarmannsins.

„Mac DeMarco er að klára nýja plötu og spilar á hátíðum eins og Coachella, Rock Werchter og fleirum í ár. Hann verður því í góðu stuði þegar hann mætir á Airwaves. Við erum ótrúlega spennt fyrir komu hans enda höfðum lengi reynt að fá hann til að koma aftur.“

Airwaves fer fram dagana 6. – 9. nóvember, vítt og breytt um miðbæ Reykjavíkur. Þetta í tuttugasta og fyrsta sinn sem hátíðin er haldin og segir Sindri engan verða svikinn af dagskránni. Nú sé tækifærið til að ná sér í miða á góðum kjörum en svokallaðir Early Bird miðar eru nú í sölu í takmarkaðan tíma í viðbót.

„Super Early Birds miðarnir eru þegar uppseldir en enn er hægt að kaupa Early Birds miða, á 14.900 krónur. Við hvetjum fólk til þess að næla sér í þá sem fyrst enda bjóðum við metnaðarfulla dagsrká. Fleiri stór nöfn sem við lögðum mikla vinnu í að fá á Airwaves er til dæmis bandaríska hljómsveitin Whitney. Gríðarlega þekkt band sem selur mikið og ekki auðvelt að bóka. Þeir eru loksins að senda frá sér nýja plötu og verða því með nýtt efni,“ segir Sindri. Eitt af markmiðum Airwaves að bóka glænýjar hljómsveitir á uppleið.

„Breska sveitin Shame hefur vakið athygli á Íslandi og er í spilun víða. Shame er mjög skemmtileg rokkhljómsveit frá London sem keyrir nýja senu áfram í Evrópu, gítardrifna tónlist en margir hafa talað um að rokkið sé að koma til baka. Nú er það í alvöru að gerast. Það er mjög gaman að sjá þessa þróun og á hátíðinni í ár verða margar athyglisverðar rokksveitir. Til dæmis hollenska hljómsveitin Sons en við sáum þá á Eurosonic og bókuðum strax. The Howl & The Hum frá Bretlandi er virkilega skemmtileg hljómsveit sem minnir á Radiohead og svo mætti lengi telja. Í íslensku deildinni kemur þungarokkið sterkt inn, Auðn og Une Misére. Við erum afar spennt fyrir Une Misére en þeir voru að skrifa undir stóran plötusamning og eru að fara spila víða í Evrópu. Auðn komu meðal annars fram á þungarokkshátíðinni Copenhell síðasta sumar á stóru sviði en þessi bönd fá ekki oft séns á að spila á stóru sviði hér heima. Það er því sérstaklega gaman að gera þeim hátt undir höfði.“

„Í poppdeildinni vil ég sérstaklega nefna Anna of the North. Hún er frábær poppstjarna frá Noregi á hraðri uppleið og þá kemur Georgia, stelpa frá Bretlandi fram á Airwaves en hún hefur vakið mikla athygli og er að spila á hátíðum úti í heimi."

Sindri segir Iceland Airwaves löngu hafa fest sig í sessi sem eina mest spennandi tónlistarhátíð heims þar sem sameinist ný og spennandi tónlist við framúrstefnulega tónlistarmenn alls staðar að úr heiminum. Tónlistarunnendur flykkist til landsins og á síðasta ári hafi metfjöldi erlendra blaðamanna sótt hátíðina.

„Það er mikil viðurkenning fyrir Airwaves og við búumst við enn fleiri blaðamönnum og bransafólki í ár. Það er ekkert nema jákvætt fyrir íslenska tónlistarsenu og nú er opið fyrir umsóknir á netinu þar sem nýjar hljómsveitir geta sótt um að spila á hátíðinni.“

Þessi kynning er unnin í samstarfi við Iceland Airwaves.

Hér fyrir neðan má sjá brot af stemmingunni í fyrra: