Ranieri tekinn aftur við uppeldisfélaginu

AS Roma staðfesti nú síðdegis að Claudio Ranieri væri tekinn við sem þjálfari liðsins fram á sumar. Hinn 67 ára gamli Ranieri verður mættur á bekkinn er Roma spilar við Empoli á mánudag.

Hann er svo sannarlega ekki ókunnugur í herbúðum félagsins enda alinn upp hjá félaginu og spilaði sex leiki fyrir aðallið félagsins leiktíðina 1973-74. Hann þjálfaði svo liðið frá 2009 til 2011.

„Það er gott að vera kominn heim. Þegar Roma hringir þá segir maður ekki nei,“ sagði Ranieri í yfirlýsingu félagsins.

Ranieri var síðast stjóri Fulham en var rekinn eftir rúmlega 100 daga í starfi.