Telur vafa leika á lögmæti sektarinnar

Annar skiptastjóra þrotabús WOW air segir óvíst um lögmæti hátt í fjögurra milljarða króna stjórnvaldssektar sem Umhverfisstofnun lagði á búið í dag. Sektin er vegna þess að WOW air gerði ekki upp losunarheimildir sínar vegna losunar gróðurhúslofttegunda í fyrra áður en frestur til þess rann út í lok apríl.

Flugfélögum ber að gera upp losunarheimildir sínar samkvæmt samevrópsku viðskiptakerfi með losunarheimildir einu sinni á ári. Fresturinn rann út 30. apríl, um mánuði eftir gjaldþrot WOW air, án þess að flugfélagið gerði heimildirnar upp.

Þorsteinn Einarsson, annar skiptastjóra þrotabúsins, segir við Vísi að frestur til að lýsa kröfum í búið renni út 3. ágúst. Þá verði tekin afstaða til lögmætis kröfunnar og hvar hún lenti í forgangsröðina.

Hann telur sektina gríðarlega háa og mögulega einsdæmi að hún sé lögð á þrotabú. Skoða þurfi hvort hún eigi sér stoð í lögum eða ekki, bæði grundvöllur hennar og fjárhæð.