Steinunn Ó­lína sækir um stöðu út­varps­stjóra

Leik- og fjölmiðlakonan Steinunn Ólína Þorsteinsdóttir hefur gert kunnugt að hún hafi sóst eftir að verða næsti útvarpsstjóri. Steinunn greindi frá þessu í grein sem ber titilinn „Við höfum öllu að tapa“, og hún birti á Facebook í gærkvöldi.

Í færslunni ræðir hún meðal annars um sýn sína á RÚV, hlutverk og stöðu einkarekinna fjölmiðla, auglýsingamarkaðinn og formann Sjálfstæðisflokksins.

Í lok færslunnar segist Steinunn að hún gengist fús við því að ætla sér að sækja um stöðu útvarpsstjóra „vegna þess að mér þykir vænt um Ríkisútvarpið og trúi staðfastlega á mikilvægi þess og læt engan segja mér annað.“ Segist hún ekki eiga neina vildarmenn í ráðandi ríkisstjórn, þekki engan stjórnarmann Ríkisútvarpsins persónulega og hafi bókstaflega engu að tapa.

Nýr útvarpsstjóri mun brátt taka við stöðunni eftir að Magnús Geir Þórðarson var nýverið skipaður næsti þjóðleikhússtjóri. Frestur til að sækja um stöðu útvarpsstjóra rann úr 2. desember, en var svo framlengdur um viku. Áður hefur mikið verið rætt um ákvörðun stjórnar RÚV að birta ekki lista yfir umsækjendur um embættið.

Sjá einnig:Telur ráðningu Magnúsar Geirs löngu ákveðna og ólykt leggja frá Efstaleiti

Steinunn ræðir í færslunni nokkuð um stöðu RÚV í samfélaginu og nefnir að þrátt fyrir að Ríkisútvarpið eigi að vera fjölmiðill allra landsmanna sé það ekki svo í allra augum. „Fólk ætti samt að staldra við þegar ráðamenn og háværar raddir slá því fram að tilvist Ríkisútvarpsins sé úrelt, að útvarpsgjaldið ætti ekki að innheimta og að stofnunin ætti ekki að njóta tekna af auglýsingum,“ segir Steinunn.

Einnig ræðir hún fjölmiðlafrumvarp Lilju Alfreðsdóttur menntamálaráðherra og Bjarna Benediktsson, fjármálaráðherra og formann Sjálfstæðisflokksins, sérstaklega í því samhengi.

Hún segir frumvarpið vera tilraun til að skapa sanngjarnara umhverfi fyrir einkarekna fjölmiðla sem halda úti ólíkum sjónarmiðum og séu lýðræðinu lífsnauðsyn.

„Að fjármálaráðherra [Bjarni Benediktsson] samþykki frumvarp Lilju menntamálaráðherra með fyrirvara um endurskoðun á auglýsingastöðu Ríkisútvarpsins á fjölmiðlamarkaði segir okkur tvennt; að hann óttast að fjölmiðlar aðrir en þeir sem eru honum þóknanlegir – sjálfstæðir fjölmiðlar eða Ríkisútvarpið – fái vald til að flytja okkur fréttir af hlutlægni þar sem okkar hagsmunir eru í fyrirrúmi. Hinsvegar bendir þetta til þess að hann sé veraldlega sinnaður gaukur sem skilur ekki mikilvægi menningarverðmæta sem ekki er hægt að kaupa og selja.

Bjarni Benediktsson vill ekki bara stjórna ríkisbókhaldinu, heldur upplýsingunni allri. Þessu eigum við að hafna, burt séð frá því hvort okkur finnst Bjarni gúddí gaur eða ekki. Réttara væri að klæða hann í aðsniðinn samfesting sem heftir afskipti hans af Íslandssögunni eins og hún er og verður vonandi varðveitt áfram í fjölþættri dagskrárgerð Ríkisútvarpsins,“ segir Steinunn Ólína í færslunni.