Þórsarar fá Stojanovic en missa Baldur

Þór Akureyri hefur fengið til sín serbneska framherjann Srdjan Stojanovic sem lék með Fjölni síðustu tvö tímabil. Baldur Örn Jóhannesson er hins vegar farinn frá Þór til Njarðvíkur.

Stojanovic er 28 ára gamall framherji sem fór með Fjölni upp úr 1. deild 2019 og lék svo í Domino's-deildinni í vetur þar sem hann skoraði 20 stig að meðaltali í leik, tók 5,8 fráköst og átti 4,1 stoðsendingu. Aðeins tólf leikmenn í deildinni voru með fleiri framlagspunkta á leiktíðinni, eða 19,29.

Baldur er 19 ára framherji sem tilheyrði sterkum 2001-árgangi Þórsara og á að baki unglingalandsleiki. Baldur lék að meðaltali 13 og hálfa mínútu í Domino‘s-deildinni í vetur og skoraði 1,9 stig og tók 3 fráköst. Hann mun spila með meistara- og unglingaflokki Njarðvíkur, segir á heimasíðu félagsins.