Búið að taka yfir 30.000 sýni

Staðfest smit nýs afbrigðis kórónuveiru sem veldur Covid-19-sjúkdómnum eru nú alls 1.616 hér á landi. Staðfestum smitum fjölgaði um þrjátíu frá því að síðustu tölur birtust á covid.is klukkan eitt í gær.

Þá eru 39 nú á sjúkrahúsi og þrettán á gjörgæslu vegna COVID-19. Alls hefur 633 manns batnað af veikinni. Þá eru 4.195 manns í sóttkví og 977 í einangrun. 13.898 hafa lokið sóttkví. Sýni sem hafa verið tekin eru orðin 30.947 talsins. Sex dauðsföll hafa verið staðfest vegna kórónuveirusmits.

Klukkan tvö verður haldinn upplýsingafundur almannavarna og landlæknis þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.

Víðir Reynisson, yfirlögregluþjónn, og Þórólfur Guðnason, sóttvarnalæknir, verða á staðnum til að upplýsa landsmenn um þróun mála með tilliti til kórónuveirunnar hér á landi. Gestir fundarins verða Sigríður Gunnarsdóttir, framkvæmdastjóri hjúkrunar á Landspítala, og Þórunn Sveinbjörnsdóttir, formaður Landssambands eldri borgara.

Fréttin hefur verið uppfærð. Í upphaflegri útgáfu hennar var misritað hversu mörg smit bættust við á milli daga.