Versta frumraun félags í 62 ár

Óskar Ófeigur Jónsson skrifar 15. júní 2020 15:00

Það voru svolítil læti í leik Blika og Gróttumanna á Kópavogsvellinum í gær. Vísir/Daníel Þór

Grótta spilaði sinn fyrsta leik í efstu deild í gærkvöldi þegar liðið tapaði 3-0 á móti Breiðabliki í Pepsi Max deild karla.

Grótta slapp reyndar ágætlega frá leiknum miðað við allt. Blikar skoruðu nokkur mörk sem voru dæmd af vegna rangstöðu og Blikarnir fengu líka fjölda tækifæra til viðbótar til að bæta við mörkum. Gróttumenn voru síðan manni færri síðasta hálftímann en töpuðu honum bara 1-0.

Þetta eru samt verstu úrslit hjá félagi í sínum allra fyrsta leik í 62 ár eða síðan að Keflavík tapaði 1-5 á móti ÍA í frumraun sinni sumarið 1958.

Bítlarnir urðu ekki til í Liverpool fyrr en tveimur árum síðar þegar Bítlabærinn eignaðist sitt fyrsta efstudeildarlið fyrir meira en sex áratugum síðan. Kærumál sáu líka til þess að fyrsti leikur Keflavíkur var ekki spilaður fyrr en í júlímánuði.

22 félög hafa spilað sinn fyrsta leik í efstu deild frá og með því að Keflvíkingar stigu sín fyrstu spor sumarið 1958. Sex þeirra hafa náð að vinna sinn fyrsta leik og alls hafa tíu af þessum nýliðum náð í stig í frumraun sinni.

Gróttumenn enduðu í hópi með þessum tólf félögum sem hafa gengið stigalaus til búningsklefa eftir sinn allra fyrsta leik í deild þeirra bestu.

Allra fyrsti leikur félaga í efstu deild karla:

Félög sem hafa fagnað sigri í frumraun sinni frá 1958 (6):
1968: ÍBV vann 3-1 sigur á Val
1975: FH vann 1-0 sigur á Fram
1990: Stjarnan vann 2-0 sigur á Þór Ak.
1997: Skallagrímur vann 3-0 sigur á Leiftri
2008: Fjölnir vann 3-0 sigur á Þrótti
2015: Leiknir vann 3-0 sigur á Val

Félög sem hafa gert jafntefli í frumraun sinni frá 1958 (4):
1978: KA gerði 2-2 jafntefli við Breiðablik
1988: Leiftur gerði 0-0 jafntefli við ÍA
1998: ÍR gerði 1-1 jafntefli við Grindavík
2007: HK gerði 0-0 jafntefli við Víking
Félög sem hafa tapað í frumraun sinni frá 1958 (12):
1958: Keflavík tapaði 1-5 fyrir ÍA
1962: ÍBÍ tapaði 0-2 fyrir KR
1971: Breiðablik tapaði 0-2 fyrir Fram
1977: Þór Ak. tapaði 2-3 fyrir Keflavík
1979: Haukar töpuðu 1-3 fyrir KA
1985: Víðir tapaði 0-1 fyrir FH
1987: Völsungur tapaði 2-4 fyrir Keflavík
1989: Fylkir tapaði 0-1 fyrir Fram
1995: Grindavík tapaði 1-2 fyrir Keflavík
2010: Selfoss tapaði 1-3 fyrir Fylki
2013: Víkingur Ó. tapaði 1-2 Fram
2020: Grótta tapaði 0-3 fyrir Breiðabliki

Pepsi Max-deild karla Grótta

Mest lesið

Fleiri fréttir