Eiffel-turninn opnaður á ný

Eiffel-turninn í París verður opnaður á ný í dag eftir að hafa verið lokaður í meira en þrjá mánuði vegna faraldurs kórónuveirunnar.

Þeir sem heimsækja turninn þurfa þó að reima á sig íþróttaskóna og þramma stigana því lyftan verður enn um sinn lokuð til að stemma stigu við frekari útbreiðslu covid-19. Þá verður gestafjöldi takmarkaður og skylda fyrir alla eldri en ellefu ára að bera grímu.

Sömuleiðis verður gestum óheimilt að fara ofar en á aðra hæð turnsins.

Smíði turnsins kláraðist 1889 og sækja um sjö milljónir ferðamanna turninn heim á ári. Um þrír af hverjum fjórum gestum koma erlendis frá.

Frá Parísarborg hafa svo einnig borist þær fréttir að Louvre-safnið opni að nýju 6. júlí.