Níundi smitaði Ís­lendingurinn kom frá Austur­ríki á sunnu­dag

Níundi Íslendingurinn sem smitaður er af kórónuveirunni sem veldur Covid19-sjúkdómnum kom heim frá Austurríki á sunnudag. Hann hafði dvalið þar ásamt fjölskyldu sinni. Þau eru öll komin í sóttkví. Þetta staðfestir Víðir Reynisson hjá almannavarnardeild ríkislögreglustjóra í samtali við Vísi.

Alls hafa níu Íslendingar verið greindir með kórónuveiru, þar af sex í gær. Þegar var greint frá því að öll smitin mætti rekja til Ítalíu nema eitt. Nú hefur verið staðfest að umrætt tilfelli má rekja til Austurríkis en maðurinn, sem er á sextugsaldri, hafði verið þar í skíðaferð með fjölskyldu sinni og flogið hingað til lands frá München í Þýskalandi.

Í gær var greint frá því að enn væri verið að reyna að ná í farþega úr flugi Icelandair frá München á sunnudag. Kona sem greindist með veiruna á sunnudag var um borð í flugvélinni en hún hafði verið í skíðaferð á Norður-Ítalíu.

Sjá einnig: Sjö hinna smituðu gistu á sama hóteli á Norður-Ítalíu

Maðurinn sætir nú heimasóttkví, sem og tveir fjölskyldumeðlimir hans. Víðir segir að gera megi ráð fyrir að fleiri sem tengist manninum verði einnig látnir sæta sóttkví.

Víðir segist sjálfur hafa rætt við manninn, sem líði ágætlega og sé ekki mikið veikur. Enn sé unnið að því að rekja ferðir hans, vinna þess efnis hafi staðið yfir í nótt og haldi áfram í dag.

Almannavarnardeild býst ekki við nýjum upplýsingum er varða kórónuveiruna fyrr en á milli klukkan tvö og fjögur í dag. Sextán tilfelli kórónuveiru hafa verið staðfest í Austurríki, samkvæmt tölum frá því í gær. Þar af hafa sextán greinst í Vín, tvö í Týról og tvö í Neðra-Austurríki.

Líkt og áður segir hafa níu tilfelli kórónuveirunnar verið staðfest á Íslandi. Sex greindust í gær, eitt síðasta föstudag og svo tvö til viðbótar um helgina. Sjö þeirra níu Íslendinga sem nú hafa greinst með kórónuveiruna gistu allir á sama hóteli á Norður-Ítalíu. Enginn Íslendingur dvelur hins vegar á hótelinu nú.

Fréttin hefur verið uppfærð.

Það sem þú gætir viljað lesa um kórónuveiruna

Nýjast: Öll nýjustu tíðindi má finna á undirsíðu Vísis um kórónuveiruna

Hvernig smitast kórónu­veiran? Kórónuveiran sem veldur sjúkdómnum COVID-19 smitast aðallega með snertismiti og svokölluðu dropasmiti.

Spurt og svarað um kórónuveiruna: Hvað er hún? Hvar greindist hún? Hvað er vitað? Hvernig á að forðast smit?

Réttindi ferðalanga vegna kórónuveirunnar: Réttur ferðamanna til að fá það tjón bætt sem þeir kunna að verða fyrir í tengslum við ferðalög vegna veirunnar er ólíkur eftir aðstæðum, til dæmis eftir því hvort fólk er að ferðast á eigin vegum eða er á bókað í pakkaferð. Heilbrigðir sem lenda í sóttkví erlendis eru ótryggðir.

Landsmenn eru minntir á mikilvægi handþvottar og sótthreinsunar. Ef einstaklingar finna fyrir veikindum er þeim bent á að hringja í síma 1700 (fyrir erlend símanúmer +354 544-4113) varðandi nánari upplýsingar og hvernig þeir eigi að nálgast heilbrigðiskerfið.