Sextán ára gugusar kemur fram á Off-Venue tónleikum

gugusar er annað sjálf Guðlaugar Sóleyjar Höskuldsdóttur sextán ára tónlistarmanns sem sló í gegn á Músíktilraunum í fyrra þar sem hún var útnefnd rafheili hátiðarinnar. gugusar kemur fram á Off-Venue tónleikum Landsbankans sem eru nú þegar aðgengilegir hér.  Sjálf hátíðin Live from Reykjavík, hefst á morgun.

„Þetta er líklega mitt stærsta gigg til þessa, Ég tek tvö lög, með Sólrúnu Mjöll trommara með mér,“ segir gugusar. Hún semur lögin sín ein inni í herbergi og finnst best að geta ráðið öllu sjálf.

„Það er svo þægilegt að gera þetta bara nákvæmlega eins og ég vil. Mér finnst skemmtilegast að semja texta sem hafa fleiri en eina merkingu. Þannig getur fólk túlkað lögin á sinn hátt. Stundum byrja ég á trommum í tölvunni og stundum sem ég á gítar. Ég kann samt ekkert á gítar, ég finn bara út úr öllum hljóðfærum og færi svo yfir í tölvuna og vinn lögin þar,“ segir gugusar en hún stundar söng- og trommunám í Tónlistarskóla FÍH.

Fékk undanþágu á tónleika Injury Reserve

„Ég á mismunandi fyrirmyndir og flokka yfirleitt ekki tónlist. Minn helsti innblástur er samt rapphljómsveitin Injury Reserve. Þeir komu á Airwaves 2018 og ég fór að gráta þegar ég sá það, mig langaði svo að fara en ég var of ung, 14 ára. Ég sendi póst á Airwaves og fékk undanþágu til að mæta á tónleikana með systur minni. Það var frábær upplifun. Þá datt mér í hug að prófa að semja sjálf og þannig byrjaði þetta. Það er Injury Reserve að þakka að ég er sjálf að spila á Airwaves.“

Fjöldi tónlistarmanna kemur fram á Off-Venue

Off-Venue tónleikarnir eru ómissandi hluti Iceland Airwaves og þekktir fyrir öðruvísi og hrárri stemmingu og meiri nánd. Tónlistarhátíðin verður með öðru sniði í ár og send beint út á Rúv og Rás 2 hér á Íslandi. Landsbankinn býður upp á Off-Venue tónlistarveislu þar sem eftirfarandi listamenn koma fram.

JóiPé & Króli 

JóiPé & Króli taka lögin Geimvera og On af plötunni Um miðjan kjarnorkuvetri, sem kom út í vor.

Moses Hightower

Hljómsveitin Moses Hightower tekur lögin Stundum og Framkvæmdir af plötunni Lyftutónlist, sem kom út núna í haust. 

BSÍ

Hljómsveitin BSÍ tekur lögin Ekki á leið og Tal 11.

Sykur

Hljómsveitin Sykur tekur lögin Svefneyjar og Lost Song af plötunni JÁTAKK sem kom út i fyrra.

Landsbankinn hefur verið styrktaraðili Iceland Airwaves frá 2014. Á hverju ári hefur Landsbankinn framleitt tónlistarmyndbönd með upprennandi listafólki, alls 23 tónlistarmönnum og hljómsveitum, sem finna má á Airwaves vef Landsbankans.