Hetjuleg framganga Katrínar Tönju í nýrri heimildarmynd

Handstöðuæfingin sem breytti öllu á leið Katrínar Tönju Davíðsdóttur á verðlaunapall heimsleikanna í ár er nú orðin efni í stutta heimildarmynd.

Íslenska CrossFit konan varð í öðru sæti á heimsleikunum í ár en Katrín Tanja hefði líklega aldrei átt möguleika á verðlaunasæti ef ekki hefði komið til mögnuð frammistaða hennar á seinni deginum í fyrri hlutanum.

Hetjuleg Katrínar Tönju í handstöðuæfingunni kallaði á frekari umfjöllun en þar er á ferðinni ein eftirminnilegasta æfing ársins þar sem Katrín Tanja rústaði sjöundu æfingunni í fyrri hluta úrslita heimsleikanna.

CompTrain hefur nú sett saman stutta heimildarmynd þar sem Katrín Tanja Davíðsdóttir fer yfir það sem var í gangi þegar hún lagði grunninn að sæti sínu í ofurúrslitum heimsleikanna.

Árið 2020 hafði byrjað skelfilega hjá Katrínu með erfiðum bakmeiðslum og gengið framan af árinu var ekki til að hrópa húrra fyrir. Dugnaður Katrínar Tönju kom henni aftur í sitt besta form á hárréttum tíma og naut líka góðs af því að heimsleikunum seinkaði fram í september.

„Ég vil ekki hanga á velgengninni og það hjálpar mér líka þegar illa gengur, því slæmu stundirnar skilgreina mig ekki heldur. Það mun stundum ganga illa hjá mér og ég mun gera mistök en það er enginn heimsendir. Ég staldra ekki við þegar vel gengur og ég ætla ekki að láta mistökin stoppa mig heldur,“ sagði Katrín Tanja í upphafi heimildarmyndarinnar.

Þegar komið var að sjöundu æfingunni í fyrri hluta heimsleikanna þá þurfti Katrín Tanja á öllum stigunum að halda enda í harðri baráttu um sætin fimm sem gáfu þátttökurétt í ofurúrslitunum.

„Hver einasta sekúnda skiptir svo miklu máli í öllum þessum æfingum. Ég vildi því ná öllum sekúndunum út úr mér ef ég gæti,“ sagði Katrín Tanja. Þegar hún fór inn í sjöundu æfinguna þá þurfti hún á mörgum stigum að halda til að vinna upp slæma byrjun á fyrri deginum.

„Ég hugsaði um það að kannski var einhver annar að halda sér á uppi lengur en ég og sá hinn sami var því kannski að komast á heimsleikana í staðinn fyrir mig. Ég hugsaði bara: Hversu mikið langar mig í þetta? Hversu mikið langar mig að komast í úrslitin?,“ sagði Katrín Tanja.

Katrín Tanja sagði líka að Ben Bergeron þjálfari hennar hafi hjálpað sér að róa sig niður eftir að það gekk ekki nógu vel í fyrstu tveimur tilraununum við handstöðuna.

„Hann hjálpaði mér að ná hjartslættinum niður með því að gera nokkrar öndunaræfingar. Ég náði að hreinsa hugann og um leið og stóð upp, þrátt fyrir að vera orðin þreytt eftir hinar tvær tilraunirnar þá hugsaði ég: Eins gott að ég láta núna slag standa,“ sagði Katrín Tanja.

Það er síðan sýnt frá æfingunni hjá Katrínu Tönju með dramatískri tónlist undir þar sem hún stendur á höndum í 2 mínútur og 54 sekúndur. Þegar frammistaðan annarra keppenda var skoðuð þá kom það í ljós að Katrín hafði verið 40 sekúndum lengur uppi en sú sem endaði í öðru sæti sem var Kari Pearce.

Katrín Tanja ætlaði að sýna heiminum það hversu mikið hana langaði að komast í ofurúrslit heimsleikanna og gerði það svo heldur betur. Katrín Tanja sótti sér líka mikinn aukakraft með velgengninni á seinni deginum.

„Ég kom út úr þessum fyrri hluta mjög ánægð og með fullt hjarta. Þegar við einbeitum okkur að því sem við ætlum að gera þá verða til galdrarnir,“ sagði Katrín Tanja. Hún hélt uppteknum hætti í ofurúrslitunum og tryggði sér þar silfurverðlaunin.

Það má sjá alla heimildarmyndina hér fyrir neðan.