Elliði sakar Katrínu um hræsni og aumt yfirklór

Katrín mætti í útvarpsþáttinn Bítið í morgun til að svara sjónarmiði sem Elliði og fleiri Sjálfstæðismenn hafa sett fram sem snýr að því að árásin á þinghúsið í Bandríkjunum sé að ýmsu leyti sambærilegt við það sem átti sér stað í Búsáhaldabyltingunni fyrir rúmum tíu árum.

Katrín taldi þennan samanburð fráleitan, fór um hann hinum háðulegustu orðum og taldi þetta einskonar smjörklípu. Elliða vildi hún ráðleggja að smíða ekki spegil nema hann væri tilbúinn að spegla sig í honum sjálfur.

Elliði er ekki á því að við svo búið megi sitja. Hann heldur sig við sinn keip. Og segir fjölmarga hafa bent á þessi líkindi. 

Hið meinta auma yfirklór

Nema bæjarstjórinn segir þetta þannig að vinstri menn vilji fordæma (réttilega) árásirnar í Washington en réttlæta ofbeldið hér á landi, eins og Elliði orðar það.

„Katrín mætti í útvarpið í morgun og hélt því fram að ofbeldið (ráðist með grjótkasti að lögreglu, gerð tilraun til að kveikja í þinghúsinu, ráðist gegn lögreglustöðinni, eldur borinn að opinberum eigum og fl.) væri í lagi af því að engin hafi verið dæmdur. Aumt er það yfirklór þótt ekki sé nema vegna þess að fjórir af níu ákærðum sakfeldir meðal annars fyrir að bíta lögreglumenn, ofbeldi gagnvart starfmönnum þingsins og fleira. Svo mikið var Katrínu niðri fyrir að hún hikaði ekki við að skaða baráttu stjórnarskrárfélagsins til að verja ofbeldið,“ segir Elliði sem hefur ritað pistil til andsvara.

Fyrir þá sem vilja rifja upp Búsáhaldabyltinguna geta meðal annars gert það með því að skoða þetta viðtal (hér ofar) Sunnu Kristínar Hilmarsdóttur blaðamanns við Sólveigu Önnu Jónsdóttur formann Eflingar sem var mjög virk í Búsáhaldabyltingunni. Þar má sjá fréttamyndir sem eru afar lýsandi.

Elliði vitnar til orða Katrínar „..við verðum alltaf að byggja á þessum grundvallarstoðum lýðræðisins í þessu tilviki dómstólanna, til þess að vita hvað er satt og rétt.“ Bæjarstjórinn lýsir sig fullkomlega sammála þessu.

„Ekki verður annað séð en þar með sé hún að lýsa því yfir að hún, og jafnvel stjórnarskrárfélagið, muni hér með virða þá niðurstöðu hæstaréttar að kosning til stjórnlagaþings hafi verið ógild. Það verður jú ...“..alltaf að byggja á þessum grundvallarstoðum lýðræðisins..“ svo vísað sé í orð Katrínar, ALLTAF. Ekki verði því meira gert með þá ógildu kosningu.“

Að vilja virða niðurstöðuna en aðeins þegar hentar

Elliði bendir á að dómstólar hafi komist að þeirri niðurstöðu að kosning um nýja stjórnarskrá hafi verið ólögleg og Katrín því annað hvort að draga til baka fyrri skoðun (sem er bara virðingavert)…

„ eða þá að hún telur að leikreglur lýðræðis eigi við um alla nema sjálfa sig og skoðanasystkini hennar. Að ofbeldi sé réttlætanlegt við innrás öfga vinstrimanna í þinghús á Íslandi en ekki öfga hægrimanna í Bandaríkjum. Að virða beri niðurstöðu dómstóla þegar þeir sýkna vinstrimenn en ekki þegar þeir komast að þeirri niðurstöðu að kosning um baráttumál hennar sjálfrar sé ógild.“

Elliði vill koma með krók á móti bragði, og segir við því að Katrín telja að fólk verði að vera tilbúið að spegla sig í eigin kröfum: „Katrín, ekki smíða spegil utan um virðingu fyrir niðurstöðum dómstóla nema þú sért tilbúinn til að spegla þig í honum sjálf.“