Kane og De Bruyne í kapphlaupi við tímann

De Bruyne fór meiddur af velli í 1-0 tapi City fyrir Chelsea í undanúrslitum FA-bikarsins síðustu helgi og missti af 2-1 sigri liðsins á Aston Villa í ensku úrvalsdeildinni í miðri viku. Hann var þó með á æfingu í gær og vonast Pep Guardiola, stjóri City, að hann verði heill heilsu á morgun.

Sergio Agüero var einnig með á æfingu í gær sem er góðs viti fyrir City-menn, sem eiga annan stórleik, við Paris Saint-Germain, í Meistaradeildinni á miðvikudag.

Harry Kane, markahæsti og stoðsendingahæsti leikmaður Tottenham á leiktíðinni, meiddist á ökkla gegn Everton síðustu helgi og missti af 2-1 sigri á Southampton á miðvikudag. Samkvæmt breskum miðlum er hann tæpur fyrir úrslitaleik morgundagsins þar sem hver klukkutími mun skipta máli.

Manchester City hefur tök á því að vinna deildabikarinn fjórða árið í röð á morgun en Tottenham freistar þess að vinna sinn fyrsta titil frá árinu 2008, þegar liðið vann sömu keppni.

Leikur liðanna hefst klukkan 15:30 á morgun og verður sýndur beint á Stöð 2 Sport 2.