Elsti Íslendingurinn með einstaklega heilbrigt hjarta

Dóra fæddist 6. júlí 1912 og fagnaði því þeim merka áfanga í dag að verða elst allra Íslendinga, en fyrra met átti Jensína Andrésdóttir sem varð 109 ára og 159 daga. Dóra tók af því tilefni fagnandi á móti fréttastofu auk þess sem forsætisráðherra færði henni blóm í morgun. Dóru finnst fínt að eldast á meðan heilsan er prýðileg.

„Mér finnst það allt í lagi á meðan ég get talað og lesið Moggann og svona,” segir Dóra, sem kveðst lesa mikið og fylgist vel með þjóðmálunum. Heilsan er fín en þó hefur heyrnin verið að hrjá hana.

Aðspurð segist Dóra skynja miklar breytingar í samfélaginu í gegnum tíðina en erfiðustu breytingarnar sé tungumálið, því oft á tíðum eigi unga fólkið erfitt með að skilja hana – og hún það á móti.

„Það skilur ekki nógu vel það sem maður segir vegna þess að málfarið og annað er dálítið breytt frá því sem var, það sem maður var alinn upp við,” segir hún.

Áskell Þórisson, sonur Dóru, segist afar stoltur af móður sinni – þó hann sé ekki alls kostar viss um að vilja sjálfur ná svo háum aldri.

„Auðvitað er ég stoltur, en um leið er ég pínulítið skelfdur ef þetta er í genunum að ég verði líka svona svakalega gamall,” segir Áskell og hlær. Hann lýsir móður sinni fyrst og fremst sem skynsamri og duglegri konu.

Bauð ökukennaranum frekar inn í kaffi

„Hún er ung í anda og hún er tilbúin til þess að taka við lífinu eins og það er og er ekkert að mikla hlutina fyrir sér. Það hefur reynst henni heilladrjúgt. Hún fór í sund reglulega og gekk alltaf í vinnuna, gerði eina tilraun til að taka bílpróf en eftir eina tilraun bauð hún ökukennaranum inn í kaffi því hún fann að þetta var eitthvað sem passaði henni ekki, að keyra bíl. Þannig að hún gekk alltaf eftir það,” segir hann.

Og heilbrigði lífsstíllinn, hreyfing, holl fæða og áfengis- og tóbaksleysi er það sem Dóra telur að skýri langlífið. „Heilsan er bara þokkaleg,” segir hún og brosir.

Áskell bendir þá á að hún hafi nýverið farið í rannsóknir hjá Íslenskri erfðagreiningu sem hafi meðal annars sýnt fram á að Dóra sé með einstaklega heilbrigt hjarta og að innri kviðfita sé nákvæmlega eins og hún á að vera. 

„Fyrir utan það að fara alloft úr hægri mjöðm þá er allt annað í ágætu lagi, sem er mjög athyglisvert,” segir Áskell og Dóra bætir við: „Þetta kemur vel út, það er ekki hægt að segja annað – þó ég sé nú svona gömul,” segir hún og hlær.