John B á Íslandi um páskana

Hann ætti að vera landsmönnum kunnugur því þetta er í fjórða skipti sem hann heimsækir Ísland og hefur meðal annars komið fram á Iceland Airwaves hátíðinni.

John B á farsælan feril sem drum & bass tónlistarmaður og plötusnúður, með lögum eins og „Up All Night“, sem kom út á Metalheadz útgáfu Íslandsvinarins Goldie, en einnig sem meðhöfundur þekktra popplaga eins og „Here I Am“ með Nicki Minaj. 

Þrátt fyrir að hafa byrjað ferilinn í harðari kima drum & bass tónlistar hefur hann farið um víðan völl og gert bæði latín, trans og popp skotna tónlist með léttum 80s blæ. Í COVID-19 heimsfaraldrinum hefur hann notið mikilla vinsælda á Twitch þar sem hann streymir líflegum DJ settum.

„Í gegnum árin hefur John B verið fastagestur hér á landi og því fannst okkur við hæfi að fá hann aftur til landsins til að fagna tíu ára starfsafmæli okkar,“ segir Bjarni Ben einn af forsprökkum Hausa.

„Tónlist hans höfðar til breiðs hóps og þar sem hann naut mikilla vinsælda á Íslandi í kringum aldamótin mun hann einblína á árin 1995 til 2005 þegar hann kemur að spila núna um páskana.“

Ásamt John B koma fram fastasnúðar Hausa þeir Croax, Untitled, Nightshock og Bjarni Ben og Tálsýn mun sjá um sjónrænt myndefni á viðburðinum. Nánari upplýsingar um viðburðinn má finna á Facebook viðburði Hausa. Hér fyrir neðan má heyra lagið Up all night.