Fjármálaeftirlitið hefur hafið athugun á tilteknum þáttum sölu á Íslandsbanka

Í svari fjármálaeftirlitsins við fyrirspurn fréttastofu kemur fram að í ljósi eftirlitshlutverks Seðlabanka Íslands getur bankinn ekki tjáð sig um málefni sem eru beintengd sölu ríkisins á eignarhlut í Íslandsbanka. Ástæðan er sú að einstakir þættir sem tengjast sölunni kunna að verða teknir til skoðunar hjá fjármálaeftirliti Seðlabankans og hefur athugun á tilteknum þáttum tengdum sölunni þegar hafist.

Í eftirlitshlutverki Seðlabankans felst aftur á móti ekki eftirlit með Bankasýslu ríkisins. Eins er bankanum ekki falið eftirlit með framkvæmd laga nr. 155/2012 um sölumeðferð eignarhluta ríkisins í fjármálafyrirtækjum. Seðlabankinn skilaði inn lögbundinni umsögn á grundvelli 2. gr. framangreindra laga um fyrirætlun ríkisins um sölumeðferð á eignarhlut í Íslandsbanka er lýtur eingöngu að jafnræði bjóðenda, líklegum áhrifum sölu á gjaldeyrismarkað, gjaldeyrisforða og laust fé í umferð. 

Með jafnræði bjóðanda í þessu samhengi er átt við að Seðlabankinn kanni áhrif þess á efnahagslega þætti málsins, þ.e. hvort kaupendur séu erlendir eða innlendir, og er það arfleifð frá því að fjármagnshöft voru við lýði. Eiga sjónarmið þar að lútandi ekki við lengur þar sem höft hafa verið afnumin og fullt jafnræði ríkir milli innlendra og erlendra aðila.

Enginn ráðherra lagði fram bókun vegna sölunnar

Eins og áður segir hefur framkvæmd sölunnar verið gagnrýnd harðlega bæði af stjórnarliðum og stjórarandstæðingum. Lilja Alfreðsdóttir sagði í viðtali við Morgunblaðið að hún hafi verið alfarið á móti þvi hvernig staðið var að sölunni á Íslandsbanka.

Þorbjörg Sigríður Gunnlaugsdóttir þingmaður Viðreisnar sagði í dag að um stórpólitísk tíðindi væri að ræða. Þorbjörg sagði þá yfirlýsingu Lilju kalla á að fundargerðir ríkisstjórnar og ráðherranefndar sem og bókanir verði lagðar fram til að varpa ljósi á aðdraganda sölunnar. 

Katrín Jakobsdóttir forsætisráðherra segir í skriflegu svari við fyrirspurn fréttastofu að enginn  ráðherra hafi óskað eftir að færa neitt til bókar þegar sala á hluta í Íslandsbanka var til umræðu. 

„Hvorki þegar málið var rætt í ríkisstjórn né ráðherranefnd um efnahagsmál. Ég styð eindregið að málið verði skoðað ofan í kjölinn og tel úttekt Ríkisendurskoðunar eðlilegt skref í þeirri skoðun,“ segir í svari Katrínar. 

Lilja sagði þá í viðtalinu í Morgunblaðinu að vegna aðstæðna og umræðunnar telji hún að hægja verði á einkavæðingunni. Hún bætti við að í hennar huga væri alveg ljóst að Landsbankinn ætti að vera áfram í eigu þjóðarinnar og sala á honum kæmi ekki til greina. 

Katrín segir í svarinu við fyrirspurn fréttastofu að aldrei hafi staðið til að selja Landsbankann. 

„Það hefur legið fyrir frá því að ríkisstjórnin var mynduð í fyrra sinn. Ég tel eðlilegt að geyma frekari hugmyndir um sölu á hlutum í Íslandsbanka.“

Fréttin var uppfærð klukkan 15:50.