Kom ekki til greina að hætta við uppsagnirnar

Við hópuppsagnir er lögbundið að gera samkomulag við trúnaðarmenn starfsfólksins. Það var gert í gær í tengslum við 57 manna uppsögn á skrifstofu Eflingar.

„Sem betur fer þá skilaði það já ásættanlegri niðurstöðu þar sem tekið var tillit til þeirra athugasemda sem hægt var að koma til móts við. Og það var alltaf tilgangurinn,“ segir Sólveig Anna í samtali við fréttastofu. Hún var til viðtals í hádegisfréttum Bylgjunnar.

Vildu þeir ekkert stöðva að það kæmi til þessarar hópuppsagnar? 

„Þú verður að fá frá þeim þeirra hugmyndir og sýn á það hvað þau ætluðu sér að ná fram. En tilgangurinn með samræðunni var aldrei að bjóða upp á að þetta yrði stöðvað, enda var stjórn búin að samþykkja að farið yrði í þessar skipulagsbreytingar.“

Valgerður Árnadóttir, fyrrverandi starfsmaður Eflingar og frænka Sólveigar Önnu, er harðorð í garð formannsins á Facebook, þar sem hún skrifar að vanvirðingin við starfsfólkið sé fordæmalaus. Hún hafi í veikindaleyfi sínu fengið uppsagnarbréf klukkan tvö í nótt. Sólveig segir að bréfin hafi verið send að loknu samráðinu - þar skipti ekki höfuðmáli klukkan hvað þau berist.

Samkomulagið felur í sér að allir fái þriggja mánaða uppsagnarfrest 

Starfsfólkið hjá Eflingu, þau eru líka flest sjálf hjá Eflingu sem starfsfólk, eru þau ekki í óþægilegri stöðu ef þau vilja leita réttar síns? 

„Að sjálfsögðu verða öll réttindi virt að öllu leyti. Og það er satt best að segja fráleitt að einhverjum detti eitthvað annað í hug.“ 

Og geta þau notað lögfræðing Eflingar til að sækja eigið mál? 

„Það mun bara koma í ljós hvernig fólk telur best að fara fram með það, ég tel ekki að það verði nein ástæða fyrir neinar lögsóknir.“

Öll sú gagnrýni sem þið hafið mætt fyrir þessa ákvörðun, telurðu að hún sé að einhverju leyti réttlætanleg eða bara eintómar árásir? 

„Ég tel að sú gagnrýni sem fram hefur komið sé ómálefnaleg og mér finnst náttúrulega ótrúlegt að fylgjast með framgöngu háttsettra aðila innan hreyfingar vinnandi fólks í gær, eins og til dæmis forseta Alþýðusambandsins.“

Þar vísar Sólveig Anna Jónsdóttir til ummæla Drífu Snædal og Sólveig bætir því við, að traust hennar til forystu Alþýðusambandsins hafi nú alveg gufað upp.

Í greinargerð til stjórnar um hópuppsögnina kemur fram að þegar fólk verður komið aftur til starfa verði starfskjörin breytt; þau missa fasta yfirvinnu, ókeypis hádegismat og eftirvinna komi í stað yfirvinnu þegar skipulögð verkefni eru unnin utan dagvinnutíma.