ÍBV vann öruggan sigur á HK

Þrátt fyrir jafna byrjun var sigur ÍBV aldrei í hættu. Gestirnir náðu forskotinu í stöðunni 3-4 og leiddu alveg til leiksloka. Í hálfleik var staðan 10-17 fyrir ÍBV.

Síðari hálfleikur var eign ÍBV sem byggði bara ofan á forskot sitt og vann að lokum 13 marka sigur, 18-31.

Hrafnhildur Hanna Þrastardóttir og Birna Berg Haraldsdóttir voru markahæstu leikmenn vallarins með fimm mörk en Hrafnhildur Hanna skoraði fimm í sjö skotum á meðan Birna skoraði mörkin fimm í átta skotum. Hjá HK voru Alfa Brá Hagalín og Sara Kristín Gunnarsdóttir markahæstar með þrjú mörk hvor.

Með sigrinum fer ÍBV upp í fjögur stig og heldur þriðja sæti deildarinnar eftir þrjá leiki. HK er á sama tíma á botninum án stiga.