„Sóknar­leikurinn vel smurður“

„Við vorum bara heilt yfir flottir í þessum leik. Þá sérstaklega þegar kemur að sóknarleiknum. Við náðum undirtökunum snemma í leiknum og létum forystuna aldrei frá okkur. Afturelding er vel drillað lið í líkamlegu formi og þeir létu okkur hafa mikið fyrir þessum sigri,“ sagði Ágúst Þór að leik loknum. 

„Mér fannst við spila fjölbreyttan sóknarleik og sköpuðum oftast nær góð færi í sóknum okkar. Við höfum verið að skora mikið í undanförnum leikjum og sóknarleikurinn er vel smurður,“ sagði hann enn fremur. 

„Aftur á móti er ýmislegt sem við þurfum að laga í varnarleiknum. Kannski bara vera sterkari maður á mann og fínpússa færslurnar okkar. Björgvin Páll kom okkur til bjargar þegar á reyndi og sá til þess að þeir kæmust ekki inn í leikinn,“ sagði Ágúst.