Allt of mikið svindl í skák­heiminum segir maðurinn sem sigraði Carl­sen

Wesley So, heimsmeistarinn í Fishcer-slembiskák, er kominn hingað til lands til að verja heimsmeistaratitilinn. Mótið sem fram fer um helgina er stærsta skákmót sem haldið hefur verið hér á landi í hálfa öld. Þetta er í annað sinn sem Wesley kemur hingað til lands.

„Mér finnst frábært að vera á Íslandi. Þetta er lítið samfélag, fólk er mjög vingjarnlegt og það er hugsað mjög vel um okkur. Mér finnst gott að tefla þar sem er kalt - það hjálpar við einbeitinguna,“ segir hann glettinn og þakkar Gunnari Björnssyni, forseta Skáksambands Íslands, kærlega fyrir góðar móttökur og gott skipulag.

Hann gerir ráð fyrir því að mótið verði erfitt, enda tefla gríðarlega færir skákmenn á mótinu. Keppt verður í Fischer-slembiskák sem er að mörgu leyti lík hefðbundinni skák. Upphafsstaðan er hins vegar tilviljunarkennd og aðrar reglur gilda um hrókeringu.

„Þetta verður erfitt og ég er viss um að menn muni gera sitt besta - en það mun ég líka gera. Ég er hingað kominn til að verja heimsmeistaratitilinn en ég óska öðrum skákmönnum alls hins besta. Ég ber mikla virðingu fyrir þessum skákmönnum,“ segir Wesley um skákmennina sem taka þátt, átta að honum meðtöldum.

Tími kominn til að einhver ræddi svindlið

Svindl hefur mikið verið til umræðu í skákheiminum síðustu vikur eftir að heimsmeistarinn í hefðbundinni skák, Magnus Carlsen, sakaði andstæðing sinn, Hans Niemann, um að hafa svindlað á stórmóti. Sá síðarnefndi hefur þvertekið fyrir að hafa svindlað. Skákþjónninn Chess.com birti hins vegar skýrslu fyrr í mánuðinum sem gaf til kynna að Niemann hafi svindlað oftar en hundrað sinnum. Carlsen hefur hins vegar ekki tekist að sanna að Niemann hafi svindlað gegn sér og hefur heimsmeistaranum nú verið stefnt; Niemann krefst fimmtán milljarða. 

Wesley kveðst ánægður með að Carlsen hafi opnað umræðuna. 

„Ég held að það hafi verið tími til kominn að einhver segði eitthvað. Það er enginn betri til þess fallinn en núverandi heimsmeistari, Magnus Carlsen. Ég held að hann hafi loksins fengið nóg, hann stóð við sína sannfæringu, enda er hann að gera það sem hann trúir að sé rétt og heldur fast í sín prinsipp,“ segir hann.

Einn besti skákmaður fyrr og síðar

Wesley telur að skákheimurinn hafi ekki gert nóg til að sporna gegn svindli síðustu ár. Hann tekur mót sem hann tefldi á í Finnlandi um daginn sem dæmi og segir að öryggisgæsla hafi mátt vera mun betri.

„Þetta er góð þróun enda er mjög mikið af fólki sem svindlar á netinu – meira að segja á allra stærstu mótunum, það eru algjörlega svindlarar þar. Það er tími til kominn að við gerum eitthvað og náum þeim. Málið er nokkuð erfitt eins og á stendur en ég held að þetta verði til þess að hlutirnir verði betri í framtíðinni.  Ef þú ert skákmaður þá eru bara ákveðnir hlutir sem þú einfaldlega getur ekki gert. Þú verður bara að leggja hart að þér og tefla með sanngjörnum og réttlátum hætti.

Wesley sigraði Magnus Carlsen árið 2019 og varð þar með heimsmeistari í Fischer-slembiskák. Aðspurður kveðst hann bera mikla virðingu fyrir skákmanninum.

„Hann er ótrúlegur - einn besti skákmaður fyrr og síðar. Hann er búinn að vera bestur síðustu ellefu ár og er mjög óskeikull skákmaður. Ég er mikill aðdáandi og hef fylgst vel með honum og leikstílnum hans, það er kannski ástæðan fyrir því að ég vann hann,“ segir Wesley.