Kokka­lands­liðið hlaut gull­verð­laun

Heimsmeistaramótið í matreiðslu er haldið þessa dagana í Lúxemborg. Íslenska kokkalandsliðið ætlar sér stóra hluti á mótinu og það fer vel af stað. Liðið tók þátt í fyrri keppnisgrein sinni í gær og í morgun var tilkynnt að það hefði hlotið gullverðlaun. 

Keppnismatreiðsla er frádráttarkeppni þar sem öll lið byrja með 100 stig sem lækk­a síðan með til­liti til snyrti­mennsku, fag­mennsku, út­lits rétta og bragðs. Gull­frammistaða er yfir 90 stig, silf­urframistaða milli 80 og 90 stig og brons milli 70 og 80 stig. Heildarúrslit verða svo kynnt Lúxemborg á fimmtudaginn, að því er segir í tilkynningu frá Klúbbi matreiðslumann, sem rekur íslenska kokkalandsliðið.

Smæðin gagnast okkur í matreiðslukeppnum

„Að koma frá litlu landi er styrkleikinn okkar, við þekkjumst öll og getum unnið mikið saman,“ er haft eftir Þóri Erlingssyni, forseta Klúbbsins, sem er að vonum ánægður.

Þar vísar hann til þess að liðið sem heild hefur færi á að hittast oft og æfa sem er erfiðara og kostnaðarsamara hjá stórum löndum. Hann bætir líka við að samstarf norrænu landsliðanna og norrænu klúbbanna sé gott og þar liggi líka styrkur. 

Norrænu löndin séu fremst meðal þjóða í faginu. „Fólk er ekki feimið við að deila sinni reynslu öðrum til góða og það er talað um það hér hjá öðrum löndum hvað það sé að skila miklum árangri,“ er haft eftir honum.

Klúbbur Matreiðslumanna framleiddi kynningarmyndband þar sem rætt er við liðsmenn og fylgst með undirbúningi þeirra. Það má sjá hér að neðan.