Hefja leit að nýju við birtingu

Umfangsmikil leit hefur staðið yfir frá klukkan tíu i morgun, en þá tóku alls átta skip þátt í aðgerðum, varðskipið Þór, björgunarskip Slysavarnafélagsins Landsbjargar auk annarra skipa og báta. Fimm skip bættust við leitina eftir hádegi sem og þyrlusveit Landhelgisgæslunnar.

Þetta kemur fram í tilkynningu frá Landhelgisgæslunni. Þar segir að skilyrði hafi verið ágæt í dag og að leitað hafi verið á stóru svæði um 25 sjómílur norðvestur af Garðskaga.

Varðskipið Þór verður á svæðinu í nótt og mun áhöfn þess hefja leit aftur í birtingu.