Svekkelsi hjá Brynjari sem bíður eftir jólunum

Brynjar Björn lét að störfum á dögunum hjá Ögryte í Svíþjóð eftir að hafa haldið liðinu upp í sænsku b-deildinni. Það verður að teljast mjög góður árangur því Brynjar tók við liðinu í fallsæti með aðeins tvö stig eftir sjö umferðir.

Vildi breytingar í kringum liðið sem er í kringum liðið

Þrátt fyrir það ákvað stjórn sænska félagsins að finna annan þjálfara. Brynjar ræddi við Ríkharð Óskar Guðnason um hvernig málin þróuðust hjá Örgryte eftir tímabilið.

„Við áttum samtal strax eftir tímabilið. Ég hafði ákveðnar hugmyndir hvað þyrfti að gera, bæði í kringum liðið og í kringum liðið sem er í kringum liðið. Það kom svo sem engin lokaniðurstaða í það en við vorum ekki alveg sammála kannski um hvað við þyrftum að bæta og hvað þyrfti að gera,“ sagði Brynjar Björn.

„Svo fer af stað einhver saga um að þeir séu að leita sér að nýjum þjálfara og það verður niðurstaðan. Við tölum saman og leiðir skilja,“ sagði Brynjar en hver voru hans viðbrögð.

Svekkelsi eftir gott tímabil

„Það var svekkelsi eftir gott tímabil í rauninni þótt að það hafi verið langt og erfitt. Félagið hafði hugmyndir til að horfa til lengri tíma og ég var í þessu til þess. Fyrst og fremst kom ég inn í þessari stöðu sem við vorum í. Klára það og held liðinu uppi. Samtalið um lengri tíma markmið og skipulagningu í liðinu átti sér aldrei stað yfir tímabilið,“ sagði Brynjar.

„Það var aldrei tímapunktur til þess því við spiluðum mótið fram á síðasta leik og síðustu sekúndu í rauninni. Það hékk ótrúlega mikið á því að við myndum halda okkur upp,“ sagði Brynjar.

Breytingar í Malmö höfðu áhrif

„Það kom í ljós að þeir höfðu einhverjar aðrar hugmyndir. Síðan eru þeirra utanaðkomandi aðstæður því það verða breytingar í Malmö. Sá sem tekur við af mér er að koma þaðan. Það fer einhver atburðarás af stað sem maður hefur ekki stjórn á,“ sagði Brynjar en er hann vonsvikinn og pirraður út í stjórnina hjá Örgryte?

„Ég var það í fyrstu en þegar þessi samtöl eru búin að eiga sér stað, bæði fyrir að það varð ljóst að ég yrði ekki áfram og eftir, þá held ég til lengri tíma að það hafi verið best í stöðunni að stíga frá borði og leyfa öðrum að taka við,“ sagði Brynjar.

Er alveg rólegur í dag

Brynjar Björn ætlar að njóta jólanna í faðmi fjölskyldunnar heima á Íslandi en hver verða hans næstu skref á ferlinum? Er hann að leita að nýju liði til að þjálfa eða er hann í pásu.

„Ég er bara nýlentur og er bara að hitta fjölskyldu og vini og vandamenn. Ég er alveg rólegur í dag og er ekki að leita að neinu eins og staðan er núna. Svo veit maður aldrei hvað gerist í framtíðinni. Akkúrat núna er ég að njóta þess að bíða eftir jólunum og jólaundirbúningnum,“ sagði Brynjar.

Hvíla hausinn á fótbolta

Áhuginn er samt enn til staðan hjá honum. „Já klárlega en á sama tíma er ég búinn að vera að atvinnumannafótbolta stanslaust síðan 1998 og hérna heima líka. Það er ágætt að fá smá pásu, hvíla hausinn og vera ekki alltaf með fótboltann á bak við eyrað,“ sagði Brynjar.