Annálar ársins 2022: Stríð, dauði drottningar, mygla, mis­tök og tásu­myndir

Við byrjuðum á jákvæðu nótunum, sigrum og sigurvegurum ársins. Sigrarnir voru fjölbreyttir og náðu allt frá stjórn- og kjaramálum yfir í björgunaraðgerðir, löng skegg og hetjudáðir sem ættu frekar heima í kvikmyndum en raunheimum.

Árið var ekki jafn laust við kórónaveiruna og jákvæðustu menn þorðu að vona. Harðar sóttvarnaraðgerðir tóku gildi í byrjun árs, samstaðan minnkaði og þolinmæði þjóðarinnar virtist að þrotum komin. Samkomutakmarkanirnar heyrðu þó fljótt sögunni til og var afléttingu þeirra fagnað verulega. Allt var svo sannarlega „látið gossa“.

Á meðan allt var „látið gossa“ fór svo að gjósa. Eldgos hófst í Meradölum og íbúar í Grindavík fögnuðu langþráðum svefni eftir andvökunæturnar vegna jarðskjálfta á svæðinu. Ferðalangar grétu og hlógu til skiptis þegar þeir sáu gosið í fyrsta sinn og björgunarsveitir áttu fullt í fangi með það að bjarga illa búnum gestum.

Hústökuleikskóli, tóm loforð, mygla og mannekla voru einkennandi fyrir skólamál ársins sem er að líða. Foreldrar sem fengu ekki pláss fyrir börnin sín á leikskólum borgarinnar mættu í ráðhús Reykjavíkur með börnin sín og kröfðust svara. Á sama tíma mætti segja að myglufaraldur hafi komið upp í skólum landsins.

Þjóðargersemin Magnús Hlynur Hreiðarsson stóð fyrir sínu á árinu og færði landsmönnum öllum gleðitíðindi í gegnum sjónvarpsskjáinn. Magnús Hlynur ferðaðist víða og sýndi okkur það skemmtilega sem íslenskt mann- og dýralíf hafði upp á að bjóða.

Rússar réðust inn í Úkraínu þann 24. febrúar og standa átökin enn yfir. Heimurinn fylgdist skelkaður með gangi mála, Úkraína sótti um aðild í NATO og Evrópusambandinu og Íslendingar, sem og aðrar þjóðir, mótmæltu innrásinni. Pútín setti herkvaðningu af stað og Zelenskiy stóð staðfastur og kallaði eftir aðstoð frá öðrum þjóðum.

Sveitarstjórnarkosningarnar tóku stórt pláss á skjám landsmanna í vor. Mörgum borgarbúum þótti greinilega bara best að kjósa Framsókn og skiptu Dagur B. Eggertsson og Einar Þorsteinsson með sér borgarstjórasætinu að lokum. Akureyringar kusu um framgang útikatta og oddviti Fjarðarlistans eignaðist barn í miðjum meirihlutaviðræðum.

Mikið hefur gengið á utan landsteinanna þetta árið. Söguleg átök hófust í Íran þegar ung kona að nafni Mahsa Jina Amini lést í haldi siðgæðislögreglunnar þar í landi. Mótmæli í kjölfar andláts hennar standa enn yfir og hafa þúsundir tekið þátt. Elísabet II Bretlandsdrottning lést, Bretum til mikils ama og Karl Bretaprins, eða öllu heldur Bretlandskonungur tók við. Þar að auki hafa þrír sinnt embætti forsætisráðherra Bretlands á árinu og í fyrsta sinn í sögu Ítalíu tók kona við embætti forsætisráðherra.

Mikið rót var innan verkalýðshreyfingarinnar. Nýtt fólk tók við, samskipti voru sögð ganga erfiðlega, vináttur héngu á bláþræði, samvinna virtist fjarlæg og nýja verkalýðsforystan klofnaði. Þá voru vöfflur á endanum bakaðar í Karphúsinu undir lok árs.

Djammþyrstir Íslendingar tóku gleði sína á ný eftir erfiðar samkomutakmarkanir og partýlaus ár. Faðmlög voru ekki lengur á bannlista og virtist kórónuveirufaraldurinn horfinn úr hugum margra. Það varð aftur gott að vera til.

Já, djammið vaknaði af værum svefni og Íslendingar fóru aftur að færa sig út fyrir landsteinanna. Við slógum ferðamet og flykktumst til Tenerife en á meðan hafði Ásgeir Jónsson, seðlabankastjóri verulegar áhyggjur af tásumyndum. Verðbólgan steig upp úr öllu valdi, stýrivextir hækkuðu og bensínlítrinn dýrari en áður.

Dýraannállinn þetta árið var ansi myrkur. Heimiliskisan Nóra týndist þegar hún var í haldi yfirvalda eftir að nágranni kvartaði yfir kattarskít í beðum sínum. Svanur með beyglaðan háls olli áhyggjum hjá borgarbúum og greint var frá meintu dýraníði í Borgarfirði. Ljósu punktar fréttastofu voru gæfir hrafnar, aldraður hundur og ánægðir íbúar dýragarða hjá Félagsstofnun stúdenta.

Mikil aukning varð á alvarlegum ofbeldisbrotum í ár. Menn voru handteknir fyrir meint skipulag hryðjuverks, eggvopnum virtist beitt í meiri mæli og lögreglan lagði hald á gífurlegt magn fíkniefna. Þá beindi lögreglan spjótum sínum að blaðamönnum eða forðaðist að veita blaðamönnum upplýsingar á víxl.

Pólitíkin komst aftur í eðlilegt horf eftir kórónaveirufaraldurinn og mátti ef til vill sjá það á skandölum ársins. Mál flóttafólks tóku mikið pláss, þjóðin hneykslaðist yfir valdbeitingu lögreglu í máli fatlaðs flóttamanns og tekist var á um sölu Íslandsbanka svo fátt eitt sé nefnt. Bjarni Benediktsson og Guðlaugur Þór Þórðarson tókust á um formannssæti og plan Bjarni sigraði á endanum. Þá tók Kristrún Frostadóttir við embætti formanns Samfylkingarinnar.

Veðurfræðingarnir fengu engan frið í ár en veðuröfgarnar sýndu sig svo sannarlega. Skógareldar og hörmungar vegna hamfarahlýnunar voru víða um heim. Snjóflóð á Vestfjörðum og ekta íslenskt rok lék fólk grátt. Hamarshöllin fauk í burt og veglokanir voru fólki til mikils ama. Ferðamennirnir fengu að upplifa almennilegt vont veður og aldrei hafa verið gefnar út fleiri rauðar veðurviðvaranir.

Ár stjarnanna var svo sannarlega viðburðaríkt. Hljóðið frá öflugum kinnhesti Will Smith á Óskarsverðlaunahátíðinni ómaði vel og lengi inn í árið eftir umdeildan brandara Chris Rock. Nýju íslensku raunveruleikaþættirnir LXS litu dagsins ljós, hulunni var svipt af tónlistarmanninum Húgó og Bachelor tárin streymdu um Hörpuna. Johnny Depp og Amber Heard tókust á í dómssal, Britney Spears gifti sig, Taylor Swift missteig sig í miðasölu og Lindsay Lohan sneri aftur á skjáinn.

Slaufanir og afslaufanir voru til umræðu eins og síðustu ár. Slaufun var líkt við mannorðsmorð en sumir sem sagðir voru hafa orðið fyrir slaufun sneru til baka eftir að hafa dregið sig í hlé. Menntaskólanemar skiluðu skömminni og börðust fyrir því að staða þolenda yrði bætt.

Kórónaveirufaraldurinn setti strik í reikninginn í byrjun íþróttaársins, grímur voru enn uppi, leikmenn vantaði og stórmót í handbolta á næsrta leyti. Valsmenn sópuðu að sér titlum sama hvort litið var til handbolta, fótbolta eða körfubolta. Talandi um körfubolta, þá varð kvennalið Njarðvíkur Íslandsmeistari sem nýliði í efstu deild. Kvennalandsliðið í fótbolta var hársbreidd frá heimsmeistaramótinu og Aron Pálmason fór aftur heim til FH. Þetta og margt fleira frá íþróttaárinu 2022 má sjá hér að neðan. 

Á eftir framúrskarandi framistöðu íþróttafólks fórum við yfir mistök ársins. Þar má nefna fall vindmylla, snjómokstur, strætóvesen og rofnar lagnir. Það var stundum allt í rusli á árinu. Svo má ekki gleyma Mission Impossible innbrotinu í Prinsinn Árbæ. Fall er þó vonandi fararheill fyrir nýtt ár. 

Við lukum yfirferð ársins á léttu nótunum og gáfum landsmönnum innsýn inn í daglegt líf  fréttamannsins, sem er heldur betur ófullkomið og fullt af hrakförum og hlátursköstum á mis heppilegum stundum. Hrossaflugur hrelldu Fanndísi, Stefán Pálsson kastaði upp eftir viðtal með Óttari og Bebbí sýndi heiðursskjöld fyrir formlega afhjúpun. Þá spurði Sindri Hallgerði hvort hún væri skotin í viðmælanda dagsins og Snorri var spurður af leikskólabarni hvort hann væri prestur. 

Frétta­stofa Stöðvar 2, Vísis og Bylgjunnar þakkar landsmönnum öllum fyrir árið sem er að líða. Við sjáumst hress og kát á skjánum á nýju ári. 

Fréttamenn höfðu umsjón með annálum ársins, Ingibjörg Sólrún Sigmarsdóttir klippti, Ragnar Visage og Salti Jóns sáu um grafík og Aníta Guðlaug Axelsdóttir sá um myndöflun.