Býr til sjónvarpsþáttaröð um nýtt SS pylsu-lag

Þættirnir ganga út á samkeppni um nýtt popplag auk nýrrar útgáfu af gamla góða SS pylsulaginu. Til að taka þátt þarf að senda inn demó á skurinn@ss.is fyrir 1. mars og mun dómnefnd velja fimm listamenn til úrslita. Í kjölfarið hefjast tökur á Skúrnum og verða þættirnir sýndir hér á Vísi.

„Við munum kynnast þessum fimm listamönnum í þáttunum, sjá hvernig þeir vinna og hvernig lagið þeirra verður til. Hver þáttur verður tileinkaður einum listamanni eða hljómsveit en tilgangur keppninnar er ekki síst að toga fram tónlistarfólk sem annars fær ekki mikla athygli, draga það út úr skúrnum, svefnherberginu, kjallaranum eða hvar sem þau eru að semja tónlist og gefa því pláss,“ segir Kristján. Í lokin mun svo almenningur kjósa bestu nýju útgáfuna og besta lagið.

„Þetta er ný nálgun, við erum ekki að elta neina aðra tónlistarþætti heldur er Skúrinn kynning á tónlistarfólki og hvernig það nálgast það að semja tónlist,“ segir Kristján en hann hefur leikstýrt tónlistarmyndböndum, sjónvarpsþáttum, heimildarmyndum og sjónvarpsauglýsingum. „Þetta er samt nýtt format fyrir mig eins og alltaf þegar maður nálgast ný verkefni, veitan er Vísir svo þetta er annar markhópur og mjög spennandi. Þetta er flott og fersk leið hjá SS að keyra þetta af stað með okkur og um leið finna nýja útgáfu af þessu klassíska og grípandi lagi,“ segir hann.

Pylsublæti á háu stigi

SS pylsur hafa löngum verð sagðar hinn óopinberi þjóðarréttur og nánast hver einasti Íslendingur hefur skoðanir á því hvað megi fara á pylsuna. Við undirbúning þáttanna segir Kristján ýmislegt hafa komið í ljós.

„Þau Þórdís Björk Þorfinnsdóttir tónlistar- og leikkona, sem leiðir þættina og Árni Beinteinn Árnason leikari, sem situr í dómnefnd eru bæði með pylsublæti! Þau hafa tekið myndir bæði saman og sitt í hvoru lagi af sér í einhverju pylsurugli! Þetta kom bara í ljós þegar við báðum þau um að vera með í þessu verkefni, enda sögðu þau strax já. 

Sjálfur vil ég meina að við Íslendingar eigum mikið inni þegar kemur að pylsum og meðlæti, ég sá það þegar ég var við tökur á sjónvarpsþáttum í New York að þar fer ýmislegt á pylsuna sem við erum almennt ekki vön að setja á hana , hrásalat, avakadó, jalapeno og hvað eina. „Sky is the limit“ segi ég.

 Í pylsuvagninum í göngugötunni á Akureyri veit ég að það er hægt að fá bakaðar baunir á pylsuna og auðvitað er kokteilsósa skyldusósa á „einni með öllu“ fyrir norðan. Þetta gæti í leiðinni orðið spennandi þróunarverkefni,“ segir Kristján í gamansömum tón.

Hægt er að fá nánari upplýsingar hér.