„Þetta eru ákveðin tímamót“

Heilsugæslan greindi frá því í gær að þau myndu hætta að bjóða upp á sýnatökur fyrir Covid en tilkynningin kom sama dag og þrjú ár voru liðin frá því að fyrsti einstaklingurinn greindist hér á landi. Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins, segir þetta tímabært.

„Það eru náttúrulega þrjú ár liðin frá því að fyrsta Covid tilfellið var greint þannig þetta eru ákveðin tímamót. Þetta voru orðin svo fá sýni sem að voru að koma hérna hjá okkur, það voru kannski tíu manns á dag, þannig við sáum að það væri erfitt að halda þessari starfsemi úti lengur,“ segir Ragnheiður.

Flestir hafi fært sig yfir í heimaprófin og taki þau gild og leiti þess ekki að staðfesta sýkingu. Heilsugæslan hefur þó enn tök á að taka sýni og senda til greiningar ef ástæða er til, líkt og Landspítalinn.

Heilsugæslan mun þó fylgjast vel með þróuninni og endurskoða ákvörðun um að hætta sýnatökum ef tilefni gefst til, svo sem ef Covid fer að sækja í sig veðrið.

„Að sjálfsögðu munum við gera það en það er allavega ekkert í sjónmáli enn þá og núna með hækkandi sól, þegar það er að koma sumar og fólk að fá D vítamín skammtinn sinn, þá held ég nú að þessu hljóti að fara að linna, þessu sýkingartímabili,“ segir Ragnheiður.

Áfram sýnatökur fyrir farþega og bólusetningar

Yfirvöld í ákveðnum löndum krefjast þess enn að farþegar framvísi neikvæðu prófi og verður áfram boðið upp á sýnatökur í heilsugæslustöðinni í Hlíðum í þeim tilvikum.

„Það virðast alltaf vera einhver lönd sem eru að fara fram á það en þeim fer verulega fækkandi. Þannig það er líklega að líða undir lok líka,“ segir Ragnheiður aðspurð um hvort það sé algengt að farið sé fram á slíkt.

Hvað bólusetningar varðar séu þær enn í gangi og er opið hús hjá Heilsugæslunni Mjódd að Álfabakka 14.

„Þar getur fólk mætt alveg frá klukkan níu til þrjú alla daga og komið í Covid bólusetningu en svo eru líka þónokkrar heilsugæslustöðvar enn að bjóða upp á bólusetningar líka. En það fer fækkandi þar líka þannig það virðist vera komin þó nokkur þekjun á þátttöku þar,“ segir Ragnheiður.

Áfram er mikið álag á heilsugæslustöðvunum þar sem ekki aðeins Covid heldur einnig aðrar öndunarfærissýkingar, einna helst streptókokkar, hafa verið að gera landsmönnum lífið leitt.

„Það eru alls konar sýkingar sem að ekkert lát virðist vera á. Þannig það er töluvert mikið að gera inni á öllum stöðvum. Við erum svona að benda fólki á að fara inn á Heilsuveru, les sig til og hlúa vel að sér þessa daga sem þetta gengur yfir, þessar pestar,“ segir Ragnheiður. Covid tímabilinu sé vonandi að ljúka.

„Við erum alltaf bjartsýn, það þýðir ekkert annað. Svo er bara hvað verður en vonandi fer þetta að líða undir lok og þetta fari bara að vera búið, þessi kafli,“ segir hún.