Grealish heldur áfram að djamma: Þeytti skífum á Ibiza

Grealish djammaði stanslaust í nokkra daga eftir að Manchester City vann Meistaradeild Evrópu og það rann varla af honum. Hann viðurkenndi meðal annars að hafa ekki sofið í fjóra daga eftir að City tryggði sér Evrópumeistaratitilinn.

Þótt mánuður sé frá úrslitaleik Meistaradeildarinnar og það styttist í að undirbúningstímabilið hefjist er Grealish hvergi nærri hættur að djamma.

Nú síðast djammaði hann á frægum skemmtistað á Ibiza. Á miðvikudaginn þeytti hann skífum með Ástralanum DJ Fisher.

Grealish sást einnig skemmta sér á stað bróður Garys Lineker, Waynes, í gær, þá ber að ofan í Spánarsólinni.

Grealish lék fimmtíu leiki fyrir City í öllum keppnum á síðasta tímabili og skoraði fimm mörk. City vann þrennuna; ensku úrvalsdeildina, ensku bikarkeppnina og Meistaradeildina.