Fannst erfitt þegar Guardiola sagði hann of feitan

Guardiola valdi Phillips ekki í leikmannahóp City fyrir leik gegn Liverpool í deildabikarnum í desember. Spánverjinn sagði að Phillips væri ekki í neinu ástandi til að spila eftir HM í Katar.

„Að mínu mati var ég ekki of þungur en stjórinn sá hlutina augljóslega öðruvísi. Ég tók þetta bara á kassann og gerði allt sem í mínu valdi stóð til að komast í eins gott form og mögulegt var,“ sagði Phillips.

„Það var erfitt að kyngja þessu vegna þess hversu mikið þetta var blásið upp og hversu margir byrjuðu að tala um þetta. Ég var á bekknum í leiknum gegn Leeds strax eftir þetta og var klár í hvern einasta leik eftir þetta.“

City keypti Phillips frá Leeds United fyrir 45 milljónir punda í fyrra. Hann spilaði aðeins 21 leik fyrir City í öllum keppnum á síðasta tímabili. Liðið vann þrennuna svokölluðu; ensku úrvalsdeildina, ensku bikarkeppnina og Meistaradeild Evrópu.