Þorlákur hættur með Þór

Þetta kemur fram á heimasíðu félagsins. Þorlákur tók við Þór haustið 2021. Undir hans stjórn enduðu Þórsarar í 7. sæti Lengjudeildarinnar 2022 og 2023.

„Við í stjórn knattspyrnudeildar Þórs viljum fyrst og fremst þakka Láka kærlega fyrir sitt framlag til félagsins síðastliðin tvö ár. Ég gladdist verulega yfir ráðningu hans á sínum tíma þar sem hann hafði víða þekkingu til að miðla til félagsins okkar ásamt því að vera reynslumikill leiðtogi,“ segir Sveinn Elías Jónsson, formaður knattspyrnudeildar Þórs, í fréttinni á heimasíðu félagsins.

„Á þessum tveimur árum hefur mörgum ungum leikmönnum verið gefið tækifæri og þeir náð að þróast í að verða lykilmenn í liðinu. Það eru spennandi tímar framundan í Þorpinu og áhugavert verkefni sem bíður eftirmanns Láka að koma okkar liði í efstu deild.“

Þorlákur er gríðarlega reynslumikill þjálfari. Hann hefur þjálfað karlalið Vals og Fylkis og gerði kvennalið Stjörnunnar að Íslandsmeisturum. Þá starfaði hann hjá KSÍ og knattspyrnusambandi Hong Kong.