Sjáðu þrennu Pedersens, mörkin sem felldu Keflavík og öll hin úr Bestu deildinni

Valur tryggði sér 2. sæti deildarinnar með 4-2 sigri á Breiðabliki á Origo-vellinum. Pedersen skoraði þrennu fyrir Valsmenn og þá gerði Anton Ari Einarsson sjálfsmark. Anton Logi Lúðvíksson og Kristófer Ingi Kristinsson skoruðu fyrir Blika.

Stjarnan kom sér í góða stöðu í baráttunni um Evrópusæti með 2-0 sigri á KR á heimavelli. Emil Atlason skoraði bæði mörk leiksins. Hann er markahæstur í deildinni með sautján mörk og vantar aðeins tvö mörk til að jafna markametið í efstu deild.

Íslandsmeistarar Víkings komu til baka og sigruðu FH í Víkinni, 2-1. FH-ingar voru yfir í hálfleik eftir að Björn Daníel Sverrisson skoraði. Snemma í seinni hálfleik fékk Ástbjörn Þórðarson rautt spjald og Víkingar nýttu sér það. Aron Elís Þrándarson jafnaði og Nikolaj Hansen skoraði svo sigurmark meistaranna.

Keflavík féll úr Bestu deildinni eftir 3-1 tap fyrir Fram í Úlfarsárdalnum. Guðmundur Magnússon, Jannik Pohl og Aron Jóhannsson skoruðu mörk Frammara sem eru nú þremur stigum frá fallsæti þegar tveimur umferðum er ólokið. Edon Osmani skoraði fyrir Keflvíkinga.

Þrátt fyrir að vera manni færri í 84 mínútur eftir að Sveinn Gísli Þorkelsson fékk rautt spjald gerði Fylkir jafntefli við HK í Kórnum, 2-2. Atli Arnarson og Anton Söjberg skoruðu fyrir HK-inga en Benedikt Daríus Garðarsson og Þórður Gunnar Hafþórsson jöfnuðu tvisvar fyrir Fylkismenn.

Þá vann KA ÍBV, 2-1, fyrir norðan. KA-menn hafa unnið alla þrjá leiki sína í úrslitakeppninni. Jóan Símun Edmundsson og Hallgrímur Mar Steingrímsson skoruðu mörk Akureyringa en Jón Ingason gerði mark Eyjamanna með skoti beint úr aukaspyrnu.

Öll mörkin úr 25. umferð Bestu deildarinnar má sjá í spilaranum hér fyrir ofan.