Komst ekki inn á Evrópumótaröðina

Smári Jökull Jónsson skrifar 15. nóvember 2023 18:31

Haraldur Franklín Magnús á mótinu sem fór fram í Tarragona á Spáni. Vísir/Getty

Haraldur Franklín Magnús náði ekki að tryggja sér sæti á Evrópumótaröðinni í golfi en úrtökumóti fyrir mótaröðina lauk í dag. Haraldur lauk keppni í 76. sæti.

Haraldur komst í gegnum niðurskurðinn á úrtökumótinu en alls voru leiknir sex hringir.

Fyrir daginn í dag sat Haraldur ásamt fjórum öðrum kylfingum í 66. sæti úrtökumótsins. Aðeins þeir sem enda í efstu 25 sætunum í úrtökumótinu vinna sér inn þáttökurétt á Evrópumótaröðinni, en séu fleiri en einn kylfingur jafnir í 25. sæti fá þeir allir sæti á mótaröðinni.

Það var því á brattann að sækja í dag og ljóst að Haraldur þyrfti að leika sitt allra besta golf til að eiga möguleika á að fara áfram.

Það tókst því miður ekki. Haraldur átti sinn versta hring á mótinu hingað til og lék hringinn á sex höggum yfir pari. Hann lauk því mótinu á pari samtals og í 76. sæti í heildina. Aðeins þeir sem léku á fjórtán höggum undir pari eða betur tryggðu sér sæti á mótaröð næsta árs.

Golf