Svan­hildur drífandi dugnaðar­forkur og skarpur greinandi

Til stendur að Svanhildur taki við að Bergdísi Ellertsdóttur núverandi sendiherra í Washington. Bergdís flyst frá sendiráði Íslands í Washington til starfa í utanríkisráðuneytinu 1. ágúst næstkomandi.

Utanríkisráðuneytið svarar þeirri spurningu um hvort hún hafi óskað eftir því að láta af embætti því svo til að almennt gegni sendiherrar og forstöðumenn sendiskrifstofa stöðum erlendis í 3-5 ár í senn og flytjast þá til, „ýmist í nýja stöðu erlendis eða til starfa í utanríkisráðuneytinu í Reykjavík. Bergdís hefur á næsta ári stýrt þremur sendiskrifstofum erlendis, í samtals 10 ár og flyst því eins og áður segir til starfa í ráðuneytinu.“

Hæfnisnefndin skipuð reyndum starfsmönnum

Spurningar og svör voru skrifleg og spurningunni um hvort Bergdís hafi lýst yfir áhuga sínum að gegna embættinu áfram er svarað með vísan til svars við fyrri spurningu. Þá segir: „í byrjun september sl. var tilkynnt innan utanríkisráðuneytisins um stöður erlendis sem ætlunin var að flytja í ágúst 2024. Staða sendiherra í Washington var ein af þeim.

Hæfisnefndin, sem Bjarni skipaði til að kanna hæfi Svanhildar, sátu formaðurinn Einar Gunnarsson, fastafulltrúi í Genf, sendiherra og fv. ráðuneytisstjóri. Aðrir nefndarmenn voru Anna Jóhannsdóttir, skrifstofustjóri laga- og stjórnsýsluskrifstofu ráðuneytisins og Hreinn Pálsson mannauðsstjóri. Öll eru þau reyndir starfsmenn utanríkisþjónustunnar og hafa starfað hvert um sig á fjölmörgum sendiskrifstofum um meira en tveggja áratuga skeið, segir í svari.

„Við mat vegna skipunar skv. 2. mgr. 9. gr. laga um utanríkisþjónustu er hlutverk hæfnisnefndar eingöngu að meta tilnefnt sendiherraefni og veita ráðgjöf um almennt hæfi og hæfni þess. Enginn annar var tilnefndur,“ segir í svari við spurningunni um hvort enginn annar hafi komið til álita en Svanhildur.

Niðurstöður hæfisnefndarinnar má svo lesa í meðfylgjandi skjali en þar segir meðal annars, eftir að hlaupið hefur verið yfir feril hennar, að hún hafi getið sér gott orð sem „stjórnandi og leiðtogi í störfum sínum hjá viðskiptaráði þar sem hún hefur stýrt sjö til tíu manna starfsliði og borið beina ábyrgð á mannahaldi, rekstri, fjármálum, stefnumótun og áætlanagerð gagnvart stjórn.“

Skarpur greinandi, hugmyndarík og frammúrskarandi

Menn hafa viljað gagnrýna þessa tilnefningu Bjarna Benediktssonar utanríkisráðherra á Svanhildi sem sendiherra en þeir hinir sömu hafa þá ekki lesið umsögnina sem er afar lofsamleg.

Þá hefur Svanhildur „enn fremur getið sér gott orð sem leiðtogi, greinandi og hugmyndasmiður í störfum sínum sem aðstoðarmaður fjármála- og forsætisráðherra, aðstoðarmaður formanns Sjálfstæðisflokksins og framkvæmdastjóri þingflokks Sjálfstæðisflokksins. Svanhildur gerði sjálf grein fyrir því í viðtali að í þessum hlutverkum hafi bein stjórnun og mannaforráð eðli máls verið takmörkuð en á móti kom að hún hafi öðlast víðfeðma þekkingu á æðstu stjórnsýslu ríksins, gangverki stjórnmala og pólitískri stefnumörkun.“

Þá er vikið að góðu orði sem Svanhildur nýtur, þar eru umsagnir lofsamlegar. „Þar kemur fram að hún þyki vera leiðtogi og liðsmaður, drífandi dugnaðarforkur, skarpur greinandi, hugmyndarík og frammúrskarandi í öllum samskiptum og framkomu.“

Einungis voru nefnd tvö atriði sem töldust líklega ekki styrkleikar hjá Svanhildi „og er annað það að viðhalda einbeitingu/áhuga á hægfara rútínuverkefnum og hitt að hún geti átt til að klára verkefni á síðustu stundu en án þess að það hafi þó komið niður á gæðum.“

• Greinargerð_og_umsögn_-_17-12-2023PDF6.6MB
  Sækja skjal