Dýra­lækna­fé­lagið gagn­rýnir um­mæli Ingu og kallar eftir yfir­vegun

„Yfirdýralæknir gegnir gríðarlega mikilvægu hlutverki hérlendis og hefur yfirumsjón með forvörnum, heilbrigði og velferð dýra. Yfirdýralækni ber, eins og öðrum embættismönnum, að starfa eftir þeim lögum og reglum sem sett eru um störf hans og störf Matvælastofnunar,“ segir í Facebook-færslu Dýralæknafélagsins.

„Ekki hafa verið lögð fram nein gögn sem styðja fullyrðingar Ingu Sæland um að yfirdýralæknir eða annað starfsfólk Matvælastofnunar hafi ekki uppfyllt sínar starfsskyldur. DÍ undirstrikar að slík ummæli, þar sem vegið er að starfsheiðri opinberra starfsmanna sem bundnir eru trúnaði um störf sín, þurfi að rökstyðja en ekki byggja á persónulegum skoðunum.“

Félagið er að vísa til viðbragða Ingu við Kveiks-þætti þar sem fjallað var um blóðmerahald en í þættinum steig bóndi fram og greindi frá því að fjórar hryssur hefðu drepist vegna vinnubragða við blóðtökuna.

Inga sagði í samtali við RÚV að Matvæalstofnun hefði „verið með niðrum sig í mörg, mörg ár, ef ekki bara alltaf“ og að yfirdýralæknir væri ekki starfi sínu vaxinn. „Það þarf náttúrlega bara að gera gangskör í því að taka almennilega til, bæði hjá Mast og skipta um yfirdýralækni,“ sagði Inga.

Dýraæknafélagið segir mikilvægt að staðreyndum sé haldið á lofti og vísa meðal annars til óháðrar blóðrannsóknar sem hafi verið framkvæmd en farið lágt í umræðunni. Persónulegar skoðanir og tilfinningar hafi verið lagðar að jöfnu við álit sérfræðinga.

„Matvælastofnun, yfirdýralæknir eða aðrir dýralæknar eru ekki hafin yfir gagnrýni og fagnaði til að mynda DÍ úttekt Ríkisendurskoðunar á störfum Matvælastofnunar í dýravelferðarmálum. Hins vegar hefur DÍ áhyggjur af þeirri þróun sem hefur orðið varðandi umræðu um dýravelferðarmál hérlendis. Því kallar DÍ sérstaklega eftir því að fjölmiðlar og opinberir aðilar vandi sína nálgun í þessum málum og byggi umræðuna á faglegum gögnum sem unnin eru af sérfræðingum,“ segir í Facebook-færslunni.

„Það slær okkur öll þegar við horfum upp á illa meðferð á dýrum og allir eru sammála um að það á aldrei að líðast. Æsifréttamennska og einhliða umræða er hins vegar ekki liður í því að bæta velferð dýra hérlendis.“