Pavel í veikinda­leyfi

Þetta staðfestir körfuknattleiksdeild Tindastóls í yfirlýsingu á Facebook. Þar segir að í ljósi veikindaforfalla Pavels muni Svavar Atli Birgisson taka tímabundið við sem þjálfari Stólanna. Honum til aðstoðar verður Helgi Freyr Margeirsson sem þjálfað hefur kvennalið Tindastóls.

Körfuknattleiksdeild Tindastóls kveðst ekki ætla að tjá sig frekar um málið á næstunni en ítrekaðar tilraunir hafa verið gerðar til að ná í forráðamenn hennar frá því í morgun. Í tilkynningu Tindastóls er fjölmiðlafólk beðið um að sýna Pavel tillitssemi í umfjöllun sinni um þessar breytingar, og virða friðhelgi hans í bataferlinu. 

Svavar Atli hefur í langan tíma verið aðstoðarþjálfari meistaraflokksins, nú síðast með Pavel, og Helgi Freyr er þjálfari meistaraflokks kvenna en bætir nú nýju hlutverki við sig fram á vorið. Auk þjálfarastarfa sinna eiga þeir Svavar og Helgi einnig farsælan feril að baki í leikmannahópi Tindastóls.

Pavel tók við sem þjálfari Tindastóls í janúar á síðasta ári, og er þetta hans fyrsta þjálfarastarf. Hann stýrði liðinu til fyrsta Íslandsmeistaratitilsins í sögu þess, síðasta vor.

Tindastóll er í harðri baráttu um sæti í úrslitakeppni Subway-deildarinnar en liðið er með 20 stig í 7. sæti, þegar þrjár umferðir eru eftir, tveimur stigum fyrir ofan Hött og Stjörnuna en Stjörnumenn sitja utan úrslitakeppnissætanna sem stendur. 

Næsti leikur Tindastóls er á heimavelli gegn Þór Þorlákshöfn á fimmtudagskvöld. Á miðvikudaginn eftir viku spilar liðið svo við Álftanes í undanúrslitum VÍS-bikarsins í Laugardalshöll.