Vlahovic tryggði Juventus bikarmeistaratitilinn

Vlahovic kom Juventus yfir strax á fjórðu mínútu leiksins eftir stoðsendingu frá Andrea Cambiaso. Reyndist það eina mark fyrri hálfleiksins og Juventus leiddi því 1-0 þegar leikmenn gengu inn til búningsherbergja.

Serbinn virtist svo vera að gulltryggja sigur Juventus er hann setti boltann í netið á 73. mínútu, en eftir skoðun myndbandsdómara var markið dæmt af vegna rangstöðu.

Leikmenn Juventus þurftu þó að leika síðustu mínútur uppbótartímans án þjálfara síns, Massimiliano Allegri, sem fékk að líta beint rautt spjald. Það kom þó ekki að sök og niðurstaðan varð 1-0 sigur Juventus og 22. bikarmeistaratitill félagsins í höfn.