Líklega síðasta veðurviðvörunin í bili

Lovísa Arnardóttir skrifar 25. maí 2024 07:30

Það gæti orðið nokkuð hlýtt fyrir norðan í dag. Vísir/Arnar

Lægð gærdagsins mjakast vestur til Grænlands og í leiðinni fjarlægast skilin landið. Núna í morgunsárið er enn nokkuð hvasst vestanlands en annars er vindur yfirleitt á bilinu fimm til tíu metrar á sekúndu. Enn er í gildi gul veðurviðvörun á Breiðafirði og Miðháheldi. Það gæti orðið vel hlýtt á norðausturlandi í dag.

„Vindurinn er núna eiginlega alveg bundinn við Reykjanes og Snæfellsnes, annars er orðinn hægur vindur og mjög fínt veður,“ segir Óli Þór Árnason veðurfræðingur á Veðurstofu Íslands.

Hann segir viðvörunina hanga inni á Snæfellsnesi því þar verði hvasst. Hér á höfuðborgarsvæðinu eigi að lægja hægt og rólega.

Er þetta þá búið í bili?

„Já, ég held það verði smá stund í það að það verði sendar aftur út viðvaranir. En það má samt hafa það í huga að þröskuldurinn á þessum árstíma er ofurlítið lægri vegna húsbíla og annarra sem eru komnir á ferðina. Það er þannig út ágúst og þá er mest verið að passa upp á þessa bíla, þeir taka á sig það mikinn vind og eru léttir. Þá er hægt að draga úr líkum á því að fólk stefni sér í voða. En þessi lægð, miðað við vindhraða, hefði alltaf orðið gul viðvörun.“

Allt að 20 stiga hiti

Samkvæmt veðurspá verður svo í dag skýjað með köflum og þurrt að kalla en lítils háttar væta suðaustanlands og að mestu léttskýjað norðaustantil. Lægðin bar með sér hlýtt loft og því er von á háum hitatölum, einkum þar sem sólar nýtur og ekki loku fyrir það skotið að hiti fara upp í 20 stig á Norðurlandi eystra.

Á morgun er síðan útlit fyrir fremur hæga suðaustanátt með lítils háttar vætu eða stöku skúrum og hita á bilinu 8 til 16 stig en áfram bjart og hiti að 20 stigum norðaustanlands.

Á vef Vegagerðarinnar, umferdin.is, má sjá að víðast hvar á landinu er greiðfært en þó víða varað við slæmu ásigkomulagi vega.

Veðurhorfur á landinu næstu daga

Á sunnudag:

Sunnan og suðaustan 5-13 m/s, hvassast suðvestantil. Dálítil væta sunnan- og vestanlands, en bjart að mestu á norðaustanverðu landinu. Hiti 10 til 18 stig.

Á mánudag og þriðjudag:

Fremur hæg breytileg átt, skýjað með köflum og sums staðar dálítil væta. Líkur á þokumóðu við ströndina. Hiti 7 til 17 stig, hlýjast inn til landsins.

Á miðvikudag:

Norðvestlæg átt, 3-10 m/s, hvassast við suðurströndina. Lítilsháttar rigning á norðanverðu landinu, en bjart með köflum og skúrir á stöku stað sunnan heiða. Hiti 8 til 17 stig, hlýjast sunnantil.

Á fimmtudag:

Líklega vestalæg eða breytileg átt með vætu, en þurrt austantil. Milt veður.

Á föstudag:

Útlit fyrir suðlæga átt með dálítilli rigningu, en þurrt að kalla norðaustantil.

Veður Færð á vegum