Innlent

Ekki verði hægt að lauma gullhúðun í lög

Árni Sæberg skrifar
Margrét Einarsdóttir er prófessor í lögfræði við Háskólann í Reykjavík.
Margrét Einarsdóttir er prófessor í lögfræði við Háskólann í Reykjavík. Félag atvinnurekenda

Starfshópur utanríkisráðherra um aðgerðir gegn gullhúðun EES-reglna hyggst leggja til að breytingar verði gerðar á verklagi við vinnslu stjórnarfrumvarpa til innleiðingar á Evrópureglum, þannig að bæði hagsmunaaðilar og alþingismenn séu rækilega upplýstir um það strax á fyrstu stigum lagasetningar ef stjórnvöld bæta innlendum reglum við EES-löggjöfina.

Í tilkynningu á vef Félags atvinnurekenda segir að þetta hafi komið fram í máli Margrétar Einarsdóttur lagaprófessors, sem á sæti í hópnum, á fundi Íslensk-evrópska verslunarráðsins og Félags atvinnurekenda í morgun.

Bjarni Benediktsson forsætisráðherra skipaði starfshópinn á meðan hann var enn utanríkisráðherra. Hópnum var falið að vinna gegn gullhúðun með því að leggja til almennar úrbætur eða tillögur vegna einstakra mála sem eru til þess fallnar að draga úr áhættunni á að gullhúðun eigi sér stað.

Hvað er gullhúðun?

Gullhúðun er hugtak sem notað er þegar gengið er lengra en reglugerðin kveður á um þegar hún er innleidd.

Skáldað dæmi væri til að mynda EES-reglugerð sem segir að Íslendingur megi ekki eiga meira en fimm hunda. Þegar reglugerðin er innleidd segir hún hins vegar að Íslendingur megi ekki eiga meira en tvo hunda. Búið er að setja gull utan um reglugerðina og gera hana þannig þyngri.

Gullhúðaða reglugerðin olli því að þessi skáldaði einstaklingur gat einungis fengið sér tvo hunda, en ekki fimm eins og aðrir í Evrópu.Grafík/Sara

Umfangið kom Margréti á óvart

Í erindi Margrétar á fundinum sagði hún að að það hefði komið henni á óvart hversu umfangsmikil gullhúðunin væri, en hún hafi sérstaklega skoðað málefnasvið umhverfis-, orku- og loftslagsráðuneytisins á tilteknu árabili og niðurstaðan verið að í 40 prósent frumvarpa, sem áttu að innleiða EES-reglur, hafi innlendum reglum verið bætt ofan á Evrópureglurnar. Ekkert benti til að drægi úr þessari tilhneigingu.

Starfshópurinn vill breytt verklag

Starfshópur utanríkisráðherra, sem Margrét á sæti í, muni gera tillögu um breytt verklag í þessum efnum. 

„Það skiptir höfuðmáli að alþingismenn og hagsmunaaðilar séu upplýstir um ef ætlunin er að gera meiri kröfur í innleiðingarlöggjöfinni en leiðir af lágmarkskröfum viðkomandi EES-löggjafar. Jafnframt er æskilegt að vekja athygli hagsmunaaðila á því eins fljótt og hægt er í undirbúningsvinnu frumvarpsgerðar,“ sagði hún.

Í tillögum starfshópsins verði lagt til að þessu verði bætt við staðlað eyðublað, sem fylgja á áformum um lagasetningu eða frumvarpsgerð.

Erindi Margrétar má sjá í spilaranum hér að neðan:

Evrópusambandið Alþingi Ríkisstjórn Bjarna Benediktssonar

Tengdar fréttir

Fjár­­mál­­a­r­áð­h­err­­a seg­­ir „lág­­marks kurt­­eis­­i“ að taka fram þeg­­ar gull­h­úð­a á lög

Fjármála- og efnahagsráðherra sagði að það væri „lágmarks kurteisi“ að tekið væri fram í lagafrumvörpum þegar gengið væri lengra en EES-samningurinn kveði á um. Lagaprófessor sagði að það væri talsvert um að slíkt væri ekki haft upp á borðum. Það væri ólýðræðislegt gagnvart Alþingismönnum. Við þær aðstæður telji þeir að verið sé að innleiða reglur samkvæmt EES-samningum þegar svo sé ekki.

Í­trek­að bent á að gull­húð­un ESB regln­a drag­a úr sam­keppn­is­hæfn­i

Samtök iðnaðarins (SI) fagna skipan starfshóps utanríkisráðherra um aðgerðir gegn gullhúðun og telja tímabært að horft verði til samkeppnishæfni Íslands við hvers kyns lagasetningu, hvort sem um ræðir innleiðingu á regluverki Evrópusambandsins í gegnum EES, eða séríslensk lög. Samtökin nefna átta dæmi um gullhúðun sem átt hefur sér stað á undanförnum árum og vekja athygli á að upptalningin sé ekki tæmandi.

Mest lesið


Fleiri fréttir

Sjá meira


×

Mest lesið