Karó­lína: Hrika­lega næs

„Þetta var hrikalega næs, ef ég má sletta“, sagði Karólína þegar hún var spurð út í léttinn sem fylgdi því að heyra lokaflaut leiksins í kvöld. Hún hélt áfram:

„Mikill léttir. Þetta var ekki fallegt í dag en mér fannst við eiga að vinna þennan leik. Veðrið bauð ekki upp á fallegan fótbolta en við skiluðum þessu vel frá okkur held ég.“

Ísland fékk mark á sig undir lok fyrri hálfleiks og Karólína var spurð út í karakterinn og hvernig henni fannst liðið bregðast við.

„Þetta var svolítið erfitt með vindinn í fangið. Við vorum svolitlir klaufar að fá þetta mark á okkur sérstaklega þar sem við vorum í sókn á undan þessu augnabliki. Við sýndum samt góðan karakter að koma sterkar inn í seinni hálfleik, þær sköpuðu sér lítið í seinni hálfleik þannig að við sigldum þessu bara heim.“

Var eitthvað sem liðið gat gert betur að mati Karólínu?

„Það er auðvitað alltaf eitthvað sem við getum gert betur. Aðstæður leiksins gerðu bara leikinn eins og hann var. Boltinn var mikið útaf og sendingarnar fóru að þeirra markmanni en við gerðum eins vel og við gátum.“

Eins og áður segir voru spyrnur Karólínu mjög hættulegar í dag en seinni stoðsendingin var úr hornspyrnu sem fann kollinn á Hildi Antonsdóttur listavel. Í upphafi seinni hálfleiks sendi Karólína þó tvær hornspyrnur í stöngina innanverða frá vinstra horninu. Var það þó ætlunin að skora úr þessum hornspyrnum?

„Það var mín ætlun að koma þessu á markið. Spyrnurnar áttu hins vegar að fara inn“, sagði Karólína og skellti upp úr áður en hún hélt áfram.

„Ég var búin að vera að æfa þetta aðeins í gær með aðstoðarþjálfaranum út af því að ég vissi að það myndi vera vindur á markið. Gekk ekki upp í dag en vindurinn kom þessu vel á markið.“

Geta Íslendingar farið að láta sig dreyma um Sviss á næsta ári? 

„Já auðvitað á maður sér draum. Við megum samt ekki fagna neinu, það eru enn tveir leikir eftir og við verðum að vera upp á okkar besta til að fá eitthvað úr því.“

Í næsta glugga er heimaleikur gegn Þýskalandi og útileikur gegn Póllandi á dagskrá. Hvaða möguleika sér Karólína í því verkefni. Ísland hefur unnið Pólland í þessari keppni og miði er möguleiki heima gegn Þýskalandi.

„Við förum í alla leiki til að vinna. Það er okkar hugarfar og það skiptir ekki máli hverjum við erum að mæta. Við ætlum að vinna alla og það er okkar markmið. Það er stutt í markmiðið náist en við verðum að vera alveg 100% til að ná því.“