Vill skýringar á seinum svörum Orkustofnunar

Þetta kemur fram í tilkynningu á heimasíðu umboðsmanns Alþingis. Þar segir að þrisvar hafi verið leitað til umboðsmanns vegna skorts á svörum frá Orkustofnun og að hann hafi í fjórgang spurst fyrir um málið. Þrátt fyrir fyrirheit Orkustofnunar um að málið væri í hæsta forgangi drógust lyktir þess á langinn.

„Bar það meðal annars með sér að framvinda þess hefði verið takmörkuð í þrettán mánuði eða fram undir lok febrúar á þessu ári. Í ljósi meðferðar málsins og þess að það tók Orkustofnun rúmlega 26 mánuði að ljúka því hefur umboðsmaður óskað eftir nánari skýringum og fleiru er lýtur að málshraða og afgreiðslutíma hjá stofnuninni,“ segir í tilkynningunni.

Umboðsmaður Alþingis segir að einnig sé hafður í huga fréttaflutningur af öðrum málum sem virðist hafa dregist á langinn hjá Orkustofnun. Umboðsmaður hefur óskað eftir upplýsingum um hvort ábendingin verði tilefni til viðbragða og þá hverra.