Merkasti stríðsþristurinn á heim­leið frá Normandí

Flugvélin er ásamt fjórum öðrum þristum úr síðari heimsstyrjöld á leið til Norður-Ameríku eftir að hafa tekið þátt í minningarathöfnum víða í Evrópu í tilefni þess að 80 ár voru liðin frá innrásinni sem breytti gangi styrjaldarinnar. Tveir þristanna eru núna í Reykjavík og von er á þeim þriðja á morgun, vél sem kallast Placid Lassie.

Flugvélarnar millilentu einnig í Reykjavík fyrir rétt rúmum mánuði á leið sinni frá Ameríku til Evrópu í leiðangri sem kallast D-Day Squadron 2024 Legacy Tour. Upphaflega var gert ráð fyrir að fimm stríðsþristar myndu fljúga um Ísland yfir Norður-Atlantshafið vegna þessa en aðeins fjórir komust. Sá fimmti bilaði í Narsarsuaq á Grænlandi.

Frá Íslandi flugu vélarnar til Bretlands þar sem þær tóku þátt í ýmsum sýningum. Hápunkturinn var dagana í kringum 6. júní þegar þær flugu yfir Ermarsundið til Frakklands. Flugvélarnar héldu síðan áfram til Þýskalands og Ítalíu þar sem einnig fóru fram minningarathafnir.

Hinn þristurinn sem núna stendur við Loftleiðahótelið gæti verið að setja nýtt met sem elsta flugvél til að fljúga til Íslands og yfir úthafið. Það er DC-3 vél með skrásetningarnúmerið N-33644. Hún er merkt Western Airlines og var upphaflega smíðuð sem farþegavél árið 1941 en tekin í þjónustu bandaríska hersins þegar Bandaríkjamenn gerðust aðilar að styrjöldinni. Flugvélin er því 83 ára gömul á þessu ári.

Samkvæmt upplýsingum frá flugþjónustunni ACE FBO, sem annast afgreiðslu vélanna, áforma áhafnir þeirra tveggja sem komnar eru til Reykjavíkur, brottför í fyrramálið, ef veðurspá leyfir. Þetta gætu verið einhver síðustu tækifæri til að sjá flugvélar úr síðari heimsstyrjöld millilenda á Íslandi því sífellt erfiðara verður að halda svo gömlum vélum flughæfum.

Almenningi var boðið að skoða flugvélarnar á Reykjavíkurflugvelli í síðasta mánuði, eins og sagt var frá í þessari frétt:

Forystuþristur Normandí-innrásarinnar millilenti einnig í Reykjavík fyrir fimm árum, þegar 75 ára afmælis D-dagsins var minnst. Flugstjórinn lýsti henni þá sem markverðustu flugvél sögunnar sem enn flygi: