Krist­rún fagnaði með Starmer: „Mikill inn­blástur fyrir okkur“

„Það var gríðarlega góð stemning þarna í gær, en það er líka mikil meðvitund um að þessum breytingum fylgir mikil ábyrgð. Þetta er auðvitað söguleg staða vegna þess hve stóran meirihluta Verkamannaflokkurinn fékk, en þau eru líka að koma inn eftir fjórtán ár af stjórn Íhaldsflokksins. Nú erum við loksins komin aftur með jafnaðarmann sem forsætisráðherra Bretlands, það er auðvitað stóra fréttin,“ segir Kristrún í samtali við Vísi. 

Hún fagnaði kosningasigrinum í Tate Modern-safninu í Lundúnum í nótt þar sem Starmer fagnaði með sínu fólki. 

„Við áttum ágætis samtal og hann er meðvitaður um það sem er að gerast á Íslandi hjá Samfylkingunni. Mjög ánægður að heyra af þeirri þróun sem hefur átt sér stað hjá flokknum á síðustu árum og veit af kosningum á næsta ári. Það er ómetanlegt að hafa svona stuðning á bakvið okkur og við munum eflaust nýta okkur hann á komandi mánuðum þegar við leggjum í þessa vegferð að koma sigri í höfn fyrir jafnaðarfólk á Íslandi.“

Í dag sagði Rishi Sunak af sér sem forsætisráðherra enda beið flokkur hans afhroð í kosningunum. Af þeim 650 einmenningskjördæmum sem kosið var um náði Verkamannaflokkurinn 410 þingætum og bætir því við sig heilum 210 þingmönnum frá því sem var áður. Íhaldsmenn ná aðeins 119 sætum og missa því 248 þingsæti

Flokkurinn hafi þurft að rífa sig í gang

„Hér er góður andi, fólk er búið að leggja mikið á sig og það er áþreifanlegt hve mikil vinnan hefur verið. En það er líka áþreifanlegt að fólk er mjög meðvitað um ábyrgð sína. Og meðvitað um að verkefninu er ekki lokið. Fyrsta skrefið hjá Starmer og hans teymi var að breyta flokknum. Það hafa verið miklar breytingar á flokknum sem Samfylkingin hefur fylgst með,“ segir Kristrún. 

Flokkurinn hafi þurft að líta í eigin barm og rífa sig í gang. Starmer hafi fært flokkinn nær fólkinu í landinum með því að leggja ofuráherslu á kjör, velferð og verðmætasköpun. 

„En þeir vita að það verður að sýna fram á breytingar sem fólk finnur fyrir í sínu daglega lífi. Það verður spennandi að fylgjast með því hvernig það tekst til.“

Kristrún fór ásamt hópi íslenskra jafnaðarmanna að fylgjast með kosningunum og læra af Verkamannaflokknum. Spurð út í lærdóm af ferðinni segir Kristrún:

„Við erum bara hér til að læra um leiðina frá stjórnarandstöðu til ríkisstjórnar og hvernig sú vegferð er. Við eru búin að hitta mjög fjölbreyttan hóp af fólki. Höfum heyrt hvað flokkurinn hefur gengið í gegnum og um mikilvægi þess á að hafa aga á skilaboðum og verklagi. Þau vita að þau þurfa strax að vera tilbúin að stíga ákveðin skref.

Þetta er auðvitað mikill innblástur fyrir okkur, að sjá að jafnaðarflokkur er að komast hér til valda. Víða hefur sósíaldemókrasía átt undir högg að sækja. Það er þessi meðvitund um að horfa á stóru málin, fara aftur í kjarnann og halda sig við það. Enda er þar af nógu að taka.“