Ghostigital þruma út nýju lagi eftir níu ár

Sveitin er eins og kunnugt er samstarfsverkefni Curvers Thoroddsen og Einars Arnar Benediktssonar (Sykurmola). Von er á plötu sem hefur verið að hægeldast síðasta áratuginn.

„Erum að vinna í sirka tólf lögum sem enda kannski í níu eða tíu á plötunni,“ segir Curver í samtali við Vísi. „Við erum að pæla í titlunum Masters of Fine Art, Drawing Fun eða Post-Digital. Allt eitthvað mjög listaháskólatengt hjá okkur.“

Þeir kumpánar hafa nefnilega ekki setið auðum höndum á tímabilinu. Báðir settust á listaskólabekk til að næla sér í gráður, þó hvor í sínu lagi. „Það væri samt gaman að vera saman í bekk einhvern tímann,“ segir Curver. „Þá værum við alltaf saman í skammarkróknum.“ Samhliða hafa þeir verið uppteknir við eigin listsköpun, Einar Örn með teikningar og alls konar myndverk og Curver í gjörningum og vídeólist.

Í laginu nýja má finna aðeins einfaldari og beinskeyttari hljóm en áður að sögn Curvers. „Bara ein skýr rödd með einfaldri sögu en ekki kakófónía af tveimur eða þremur röddum í einu eins og á eldri plötunum okkar.“

Óvænt stemning kringum remix-útgáfu President Bongo úr GusGus á laginu „Hvar eru peningarnir mínir?“ undanfarna mánuði spiluðu líka inn í samkvæmt sveitinni. Ghostigital-gumpum langaði að svara því og taka undir, minna á eigin hljóðheim fyrst þeir væru að vinna í plötunni.

„Við hlustuðum líka mikið á tónlist frá PC Music útgáfunni þegar við byrjuðum að leggja grunninn að þessari plötu fyrir skrilljón árum síðan.“ Það hafi þannig kannski líka skilað sér í poppaðri hljóðheimi.

Fyrstu tónleikar sveitarinnar í sex ár voru á Norðanpaunki í fyrra og eru þeir þakklátir Ægi Sindra og öðrum skipuleggjendum hátíðarinnar fyrir að fá þá til að spila. „Já, það var kannski það sem kick-startaði okkur í gang. Við fundum strax að okkur fannst gaman að spila saman heiðarlegt og kraftmikið sett. Svona „venjulega“ Ghostigital tónleika, ef það er til, í stað listrænni performansa og allra þessara listaháskólapælinga okkar. Norðanpaunk minnti okkur á kjarnann okkar og hvað okkur finnst gaman að spila með allt í botni,“ segir Curver. Svo það eru sannarlega tónleikar á döfinni, núna næst á Hamraborg Festival í Kópavogi í lok ágúst.

Þeim þykir þó leitt að komast ekki á Norðanpaunk núna um helgina vegna anna, en þetta ættarmót pönkara heldur upp á tíu ára afmæli sitt um verslunarmannahelgina.